'இயந்திரங்களை திருத்தித் தாருங்கள்'

-நடராசா கிருஸ்ணகுமார்

யாழ்ப்பாணம் - வேலணைத்துறையூர் கடற்றொழிலாளர்கள் அபிவிருத்தி அமைப்பில் பழுதடைந்துள்ள ஐஸ் கட்டித் தொழிற்சாலை இயந்திரங்களையும் உபகரணங்களையும் திருத்தம் செய்து தருமாறு கடற்றொழிலாளர்களின் பிரதிநிதிகள் நாடாளுமன்ற உறுப்பினர் சிவஞானம் சிறிதரனிடம் வேண்டுகோள் விடுத்துள்ளனர்.

கடந்த அரசாங்க காலத்தில் ஜப்பான் நாட்டின் நிதியுதவியுடன் இத் தொழிற்சாலைக்கான உபகரணங்கள் வழங்கப்பட்டன. அவை தற்போது பழுதடைந்த நிலையில் இருப்பதன் காரணமாக ஐஸ் கட்டியை உற்பத்தி செய்ய முடியாமல் இருப்பதாகவும் 15 இலட்சம் ரூபாய்க்கும் மேலான நிதி இச் சாதனங்களை திருத்தம் செய்வதற்கு தேவைப்படும் என கடற்றொழிலாளர்கள் தெரிவித்துள்ளனர்.

சாதனங்கள் திருத்தம் செய்யப்படும்போதுதான் ஐஸ் உற்பத்தியில் ஈடுபட முடியுமெனவும் ஐஸ் உற்பத்தி இடம்பெறாமையினால் ஐஸினை யாழ்ப்பாணத்திலிருந்தே வேலணைக்கு எடுத்துச் செல்ல வேண்டியுள்ளதாகவும் நாடாளுமன்ற உறுப்பினரிடம் தெரிவிக்கப்பட்டது.