'தமிழ் மக்கள் கொல்லப்படுவதற்கு சம்பந்தனும் ஓர் காரணம்'

-எஸ்.நிதர்ஷன்

“முள்ளிவாய்க்காலில் பல இலட்சம் தமிழ் மக்கள் கொல்லப்படுவதற்கு காரணமானவர்களில் தமிழ்த் தேசியக் கூட்டமைப்பின் தலைவர் இரா.சம்பந்தனும் ஒருவர்” என, தெரிவித்துள்ள தமிழ்த் தேசிய மக்கள் முன்ணனியின் பொதுச்செயலாளர் செல்வராஜா கஜேந்திரன், “நாங்கள் கொல்லப்பட்டாலும் எங்களது கொள்கை உறுதியிலிருந்து விலக மாட்டோம்” எனவும் தெரிவித்துள்ளார்.

தமிழ்த் தேசிய மக்கள் முன்னணியின் மேதின நிகழ்வு சாவகச்சேரியில் திங்கட்கிழமை நடைபெற்றபோது, உரையாற்றுகையில் அவர் இதனைக் கூறினார்.

அவர் தொடர்ந்து கூறுகையில், “காணாமல் போனோருக்கு என்ன நடந்தது என்று அவர்களது உறவுகள் பரிதவித்து கொண்டுள்ளார்கள். அரசியல் கைதிகளின் விடுதலை எப்போது என ஏங்கி கொண்டுள்ளார்கள். பட்டதாரிகள் வேலை கோரி மாதக்கணக்கில் வீதிகளில் போராடி கொண்டுள்ளார்கள்.  

2016 இல் தீர்வு என, எதிர்க்கட்சித் தலைவர் சம்பந்தன் ​சொன்னது நடக்கவில்லை. தொடர் பொய்களை அவர் கூறி வருகின்றார்.

தமிழ்த் தேசியக் கூட்டமைப்பு, சுயநிர்ணய அடிப்படையில் சமஷ்டியை வலியுறுத்தி புலிகளையும் போராட்டத்தையும் காப்பாற்ற வேண்டும் என சம்பந்தனிடம் கெஞ்சினேன். ஆனால், அதனை சம்பந்தன் செய்யவில்லை. பல இலட்சம் மக்கள் கொல்லப்படுவதற்கு சம்பந்தனும் காரணமாக உள்ளார்” என்றார்.