ஆழிப்பேரலை நினைவாலயம் அமைப்பதற்கு நிதி ஒதுக்கீடு

முல்லைத்தீவில் ஆழிப்பேரலை நினைவாலயம் அமைப்பதற்காக 2 மில்லியன் ரூபாய்  நிதியை வடமாணசபை ஒதுக்கீடு செய்துள்ளதென  வடமாகாணசபை உறுப்பினர் துரைராசா ரவிகரன் தெரிவித்தார்.

நினைவாலயம் அமைக்கப்படவுள்ள இடம் அண்மையில் கள ஆய்வுக்கு உட்படுத்தப்பட்டதாகவும் அவர் தெரிவித்தார்.

இது தொடர்பில் அவர் மேலும் தெரிவிக்கையில்,

கடந்த 2004 ஆழிப்பேரலை பேரழிவின் போது உயிரிழந்த ஆயிரக்கணக்கான எங்கள் உறவுகளின் உடல்கள், முள்ளியவளை மாமூலை-நெடுங்கேணி பாதையில் கயட்டை என்கிற இடத்தில் புதைக்கப்பட்டிருந்தது. கடல்கோள் பேரழிவு நடந்து 10 ஆண்டுகளுக்கு மேல் ஆகியும் அவ்விடத்தில் ஒரு நினைவாலயம் இன்னும் அமைக்கப்படவில்லை. ஒவ்வொரு முறையும் நினைவு நாளுக்கு முன்னதாக மக்கள் அங்கே சென்று அவ்விடத்தை துப்பரவு செய்தே உறவுகளை நினைவு கூர்ந்து வருகின்றனர்.

இந்நிலையில், ஒரு சிறப்பு நிதி ஒதுக்கீட்டின் ஊடாக அவ்விடம் புனரமிக்கப்பட்டு நினைவிடம் ஒன்று அமைக்கப்படவேண்டும் என்று இவ்வாண்டு தொடக்கத்தில் வடமாகாண முதலமைச்சரிடம் எழுத்து மூல கோரிக்கை விடுத்திருந்தேன்.

அத்துடன் மாகாண நிதி ஒதுக்கீட்டுக் கூட்டத்திலும் இதன் முக்கியத்துவத்தை தெளிவுபடுத்தியிருந்தேன். இதையடுத்து வட மாகாணசபையால் சிறப்பு ஒதுக்கீடாக 2 மில்லியன் ரூபாய் நிதி ஒதுக்கப்பட்டுள்ளது.

அண்மையில் குறித்த இடத்திற்கு உள்ளூராட்சி உதவி ஆணையாளர் அலுவலக தொழில்நுட்ப அலுவலரை அழைத்துச் சென்று நேரில் காண்பித்தேன்.

உறவுகள் புதைக்கப்பட்ட 7 இடங்களை தனித்தனியாக அடையாளப்படுத்தல், நினைவுத் தூபி அமைத்தல் மற்றும் சுற்றுமதில் அமைத்தல் உள்ளிட்ட விடயங்களின் அளவீடுகள் மற்றும் மதிப்பீடுகள் பற்றி விரிவாக கலந்துரையாடப்பட்டது. கட்டுமானப் பணிகள் விரைவில் ஆரம்பிக்கப்படும்.

இவ்விடத்தில் நினைவாலயம் அமைக்கப்பட வேண்டும் என்று மக்கள் வைத்த கோரிக்கை நிறைவேற்றப்பட உள்ளமை மனநிறைவைத் தருகிறது என்று தெரிவித்தார்