உழவு இயந்திரங்கள் பழுது : நிலத்தை பண்படுத்துவதில் நெருக்கடி

நடராசா கிருஸ்ணகுமார்

முல்லைத்தீவு மாவட்டத்தில் கமநல சேவை நிலையங்களில் உள்ள உழவு இயந்திரங்கள் பழுதடைந்திருப்பதன் காரணமாக காலபோக நெற்செய்கையில் ஈடுபடவுள்ள விவசாயிகள் நிலத்தினைப் பண்படுத்துவதில் நெருக்கடிகளை எதிர்கொண்டுள்ளனர்.

கடந்த அரசாங்கத்தின் பொருளாதார அபிவிருத்தி அமைச்சினால் கமநல சேவை நிலையங்களுக்கு உழவு இயந்திரங்கள் வழங்கப்பட்டிருந்தன. அவை மூலம் கமநல சேவை நிலையங்கள் விவசாய நிலங்களை பண்படுத்தி வந்தன.

கமநல சேவை நிலையங்களில் உள்ள உழவு இயந்திரங்கள் பழுதடைந்திருப்பதன் காரணமாக அவை காலபோக நெற்செய்கையில் நிலப் பண்படுத்தலில் ஈடுபடுத்த முடியாது. இதனால் விவசாயிகள் நிலப்பண்படுத்தலில் தனியார் உழவு இயந்திரங்களை கூடுதலான நிதியை வழங்கிப் பயன்படுத்த வேண்டிய நிலை தற்போது காணப்படுகின்றது.

கமநல சேவை நிலையங்களில் பழுதடைந்துள்ள உழவு இயந்திரங்களை வேகமாக திருத்தம் செய்து, எதிர்வரும் காலபோகத்தில் நிலப்பண்படுத்தலுக்கு பயன்படுத்த உதவுமாறு விவசாயிகள் கோரிக்கை விடுத்துள்ளனர்.