காணாமற்போனோர் விவகாரம்: பிரதமருக்கு நெருக்குவாரம்

எம்.றொசாந்த்

'காணாமற்போனோரில் பலர் கொல்லப்பட்டுவிட்டதாகக் கூறும் பிரதமர் ரணில் விக்கிரமசிங்கவுக்கு, காணாமற்போன ஏனையோர் பற்றிய விவரங்களும் தெரிந்திருக்கும். முழுவிடயங்களையும் தெரிந்த அவர், அதனை வெளிப்படுத்த வேண்டும்' என, காணாமற்போனோரின் உறவினர்கள் கோரிக்கை முன்வைத்துள்ளனர்.

சமவுரிமை இயக்கத்தின் ஏற்பாட்டில் யாழ்ப்பாணம் மத்திய பஸ் நிலையத்தில் திங்கட்கிழமை (25) நடைபெற்ற கவனயீர்ப்பு ஆர்ப்பாட்டத்தில் கலந்துகொண்ட பின்னர் ஊடகங்களுக்கு கருத்துத் தெரிவிக்கையிலேயே உறவினர்கள் மேற்கண்டவாறு கூறினர்.

அவர்கள் தொடர்ந்து கூறுகையில்,

பொங்கல் தினத்தன்று யாழ்ப்பாணத்துக்கு வந்திருந்த பிரதமர், காணாமற்போனோரில் பலர் கொல்லப்பட்டுவிட்டதாக கூறினார். அவ்வாறாயின் அவர்களை கொலை செய்தது யார் என்பதனை பிரதமர் அன்றைய தினமே வெளிப்படுத்தியிருக்க வேண்டும்.  

கொல்லப்பட்டவர்களின் விவரம் தெரிந்தால், ஏனையோர் பற்றிய தகவல்களும் அவருக்கு தெரிந்திருக்க வேண்டும். அதனை அவர் வெளிப்படுத்த வேண்டும் என தெரிவித்தனர்.  

இதேவேளை,ஜே.வி.பி கலவரத்தின் போது காணாமற்போனோர் தொடர்பிலும் கண்டறிவதற்கு இந்த அரசாங்கம் நடவடிக்கை எடுக்கவேண்டும் என சம உரிமை இயக்கம் வேண்டுகோள் விடுத்துள்ளது.