நீலங்காட்டு கடற்படை முகாமை அகற்றக்கோரிக்கை

-எஸ்.ஜெகநாதன்

காரைநகர், நீலங்காட்டு பகுதியில் அமைந்துள்ள கடற்படை முகாமை அங்கிருந்து அகற்றி, மீனவர்கள் அப்பகுதியை இறங்குதுறையாக பயன்படுத்த நடவடிக்கை எடுக்குமாறு அப்பகுதி மக்கள் கோரிக்கை விடுத்துள்ளனர்.

காரைநகர் பிரதேச அபிவிருத்திக் குழுக்கூட்டம் திங்கட்கிழமை (29) பிரதேச செயலக மாநாட்டு மண்டபத்தில் நடைபெற்றது. இதன்போதே, இவ்வாறு கோரிக்கை  முன்வைக்கப்பட்டது.

தாங்கள் மீன்பிடித்துக் கொண்டிருக்கும் போது, கடற்படை படகுகளுக்கு அருகில் செல்வதால், தமது மீன்பிடி படகுகள் சேதமடைவதுடன், வலைகளும் அறுக்கப்படுகின்றன. எனவே, அதனை தடுப்பதற்கு நடவடிக்கை எடுக்குமாறு மீனவர்கள் கோரிக்கை விடுத்தனர்.

மேலும், இது தொடர்பில் கடற்படையினருடன் கலந்துரையாடுவதற்கு ஏற்பாடு செய்து தருமாறும் மீனவர்கள் கோரிக்கை விடுத்துள்ளனர்.