‘புதிய கூட்டணி கூட்டமைப்பின் ‘பி’ அணி’

-எஸ்.நிதர்ஷன்

புதிய கூட்டணியானது, தமிழ்த் தேசியக் கூட்டமைப்பின் “பி“ அணி என்றுத் தெரிவித்த தமிழ்த் தேசிய மக்கள் முன்னணியின் தலைவர் கஜேந்திரகுமார் பொன்னம்பலம், கூட்டமைப்புக்கும் இந்தக் கூட்டணிக்கும் கொள்கையில் வித்தியாசமில்லையென்றும் கூறினார்.

யாழ்ப்பாணத்தில் உள்ள கட்சி அலுவலகத்தில், நேற்று முன்தினம் (11) நடைபெற்ற ஊடகவியலாளர் சந்திப்பின் போதே, அவர் இவ்வாறு தெரிவித்தார்.

அங்கு தொடர்ந்து​ரைத்த அவர், இன்றைக்கு, வடக்கு. கிழக்கில். இரண்டாம் பெரும் கட்சியாக தாங்கள் இருப்பதாகவும் தங்களுடைய வளர்ச்சியைத் தடுப்பதற்காக, கொள்கை ரீதியாக எந்தவிதமான வித்தியாசமும் இல்லாமல் இன்னுமொரு மாற்று அமைப்பு என்று கூறிக் கொண்டு, ஒரு சிலர் செயற்படுவதாகவும் சாடினார்.

இவர்கள், வரவிருக்கும் தேர்தலில், தங்களுக்கு வரக் கூடிய அங்கிகாரத்தை ஏதோவொரு வகையில் குழப்புவதற்கு முயற்சிக்கிறார்களெனவத் தெரிவித்த கஜேந்திரகுமார், எது எவ்வாறாயினும், இந்தக் கூட்டணியால் நிச்சயமாக தங்களது வாக்கு வங்கியை சரிக்க முடியாதெனவும் கூறினார்.