மோட்டார் சைக்கிள் மோதி வயோதிபர் படுகாயம்

-செல்வநாயகம் கபிலன்

அச்சுவேலி வைத்தியசாலைக்கு அருகில், இன்று புதன்கிழமை காலை இடம்பெற்ற வாகன விபத்தில் வயோதிபர் ஒருவர் படுகாயங்களுக்குள்ளாகி, யாழ். போதனா வைத்தியசாலையில் அனுமதிக்கப்பட்டுள்ளார்.

அச்சுவேலி தெற்கு பகுதியைச் சேர்ந்த செல்லையா கணபதிபிள்ளை (வயது 81) என்ற முதியவரே இவ்வாறு படுகாயங்களுக்குள்ளாகியுள்ளதாக அச்சுவேலி பொலிஸார்; தெரிவித்தனர்.

வேகக்கட்டுப்பாட்டை இழந்த மோட்டார் சைக்கிள்,எதிரே வந்த சைக்கிளுடன் மோதி விபத்துக்குள்ளானது.

இதில்,  சைக்கிளில் பயணித்த வயோதிபர், படுகாயங்களுக்குள்ளாகி அச்சுவேலி பிரதேச வைத்தியசாலையில் அனுமதிக்கப்பட்டு பின்னர், மேலதிக சிகிச்சைக்காக யாழ். போதனா வைத்தியசாலைக்கு மாற்றப்பட்டார்.

இதன்போது, மோட்டார் சைக்கிளை செலுத்திச் சென்றவரை அச்சுவேலி பொலிஸார் கைது செய்துள்ளனர்.