யாழ். பல்கலைக்கழக மோதல்: வழக்கு விசாரணை ஒத்திவைப்பு

-எம்.றொசாந்த்

யாழ்.பல்கலைக்கழகத்தில் இடம்பெற்ற கைகலப்பு தொடர்பில் சட்ட நடவடிக்கைக்குட்படுத்தப்பட்ட மாணவர் ஒன்றியத்தலைவர் சிசிந்திரனின் வழக்கு விசாரணையினை எதிர்வரும் செப்டெம்பர் மாதம் 22ஆம் திகதிக்கு யாழ். நீதவான் நீதிமன்ற பதில் நீதவான் வி.ரி.சிவலிங்கம் ஒத்திவைத்துள்ளார்.

கடந்த மாதம் 16ஆம் திகதி யாழ்.பல்கலைக்கழகத்தில் புதுமுக மாணவர்களை வரவேற்கும் நிகழ்வின் போது விஞ்ஞான பீட மாணவர்களுக்கு இடையில் ஏற்பட்ட வாய்த்தர்க்கம் முரண்பாடாக மாறியது.

இதன்போது தாக்குதலுக்கு இலக்காகிய மாணவர், தன்னைத் தாங்கியது பல்கலைக்கழக மாணவர் ஒன்றியத் தலைவர் என  அளித்த வாக்குமூலத்தின் அடிப்படையில் கோப்பாய் பொலிஸார் பல்கலைக்கழக மாணவர் ஒன்றியத்தலைவரைக் கைதுசெய்ய முயன்ற வேளை, மாணவர் ஒன்றியத் தலைவர் கடந்த ஜூலை மாதம் 20ஆம் திகதி நீதிமன்றில் சரணடைந்தார். விசாரணைகளை மேற்கொண்ட நீதவான், மேற்படி வழக்கினை இன்றையதினம் (25) வரை ஒத்திவைத்தார்.  
 
குறித்த வழக்கு, இன்று வியாழக்கிழமை (25) யாழ்.நீதவான் நீதிமன்ற பதில் நீதவான் முன்னிலையில் மீண்டும் விசாரணைக்கு எடுத்துக்கொள்ளப்பட்டது.  

இதன்போது, கோப்பாய் பொலிஸாரால் அழைப்பு விடுக்கப்பட்ட ஏனைய 3 தமிழ் மாணவர்களும் மன்றில் ஆஜராகியிருந்தனர்.

மேற்படி வழக்கில் இன்றையதினம் ஆஜரான 3 மாணவர்களும் தலா 60 ஆயிரம் ரூபாய் பெறுமதியான ஆட்பிணையில் விடுவிக்கப்பட்டதுடன், எதிர்வரும் செப்டெம்பர் மாதம் 22ஆம் திகதிக்கு வழக்கினை ஒத்திவைத்தார்.