புத்தளம் பாத்திமா முஸ்லிம் மகளிர் கல்லூரியின் பொன்விழா நிகழ்வு ஆரம்பம்

(எஸ். எம். மும்தாஜ், எம். என். எம் ஹிஜாஸ், எஸ். எப். ஜெசீரா)

புத்தளம் பாத்திமா முஸ்லிம் மகளிர் கல்லூரி ஆரம்பிக்கப்பட்டு ஐம்பது ஆண்டுகள் பூர்த்தியையொட்டிய பொன்விழா நிகழ்வுகளின் ஆரம்ப தின நிகழ்வுகள் நேற்று செவ்வாய்க்கிழமை மாலை இடம்பெற்றது.

கல்லூரி அதிபர் சுமையா றிஸ்வான் தலைமையில் இடம்பெற்ற முதல் நாள் நிகழ்வில் வட மேல் மாகாண சபை உறுப்பினர்களான ஆப்தீன் எஹியா, ஏ. எச். எம். றியாஸ், என். டி. எம். தாஹிர், புத்தளம் நகர சபை தலைவர் கே.ஏ.பாயிஸ், முன்னாள் மாகாண அமைச்சர் எம்.எச்.எம். நவவி உள்ளிட்ட பலர் கலந்துகொண்டனர்.

இதன்போது கல்லூரியில் புதிதாக நிர்மாணிக்கப்பட்ட வாயிற் கதவு திறந்து வைக்கப்பட்டதுடன் அத்துடன் மாணவிகளின் பல்வேறு திறமைகளை வெளிக்காட்டும் வகையிலான கலை நிகழ்ச்சிகள் பலவும் இடம்பெற்றது.

இரண்டாவது தினமான இன்று புதன்கிழமை முதல் சனிக்கிழமை வரை இடம்பெறவுள்ள பொன்விழா நிகழ்வுகளில் கண்காட்சி நிகழ்வுகள்,  கல்லூரியின் நினைவுத் தூபி திறப்பு, பொன்விழா சிறப்பு மலர் வெளியீடு, இணையத்தள அங்குரார்ப்பணம், கவியரங்கம், பட்டிமன்றம் மற்றும் பரிசளிப்பு வைபவம் உள்ளிட்ட பல்வேறு நிகழ்ச்சிகள் ஏற்பாடு செய்யப்பட்டுள்ளதாக ஏற்பாட்டுக் குழுவினர் தெரிவித்தனர்.