‘பொலிஸ் காவலரண் வேண்டும்’

க. அகரன்

வவுனியா, வைரவபுளியங்குளம் மைதானத்துக்கு முன்பாக பொலிஸ் காவலரண் அமைக்கப்பட வேண்டுமென, வவுனியா தனியார் கல்வி நிலையங்களின் ஒன்றியம் வேண்டுகோள் விடுத்துள்ளது.

வைரவபுளியங்குளத்தினை மையமாகக் கொண்டு இயங்கி வரும் தனியார் கல்வி நிலையங்களுக்கு  தூர இடங்களிலிருந்தும் அதிகளவான மாணவர்கள் வருகின்றனர்.

இந்நிலையில், இச் சுற்றாடலில் இடம்பெறும் அசம்பாவிதங்கள் தொடர்பாக, பெற்றோர் முறையிட்டு வருகின்றனர்.

கற்றல் செயற்பாடுகளுக்கு அப்பாற்பட்ட நபர்கள், மது அருந்துதல், போத்தல்களை உடைத்தல், பெண் பிள்ளைகளுடன் தகாத வார்த்தை பிரயோகங்களை மேற்கொள்ளல், மாணவர்களை வீண் வம்புக்கு அழைத்தல் மற்றும் குழுச்சண்டை போன்ற பல விடயங்களில் ஈடுபட்டு வருகின்றனர்.

எனவே, மாணவர்களின் கற்றல் செயற்பாடுகளுக்கு சிறந்த சூழலை உருவாக்குவதற்கு, அப்பகுதியில் பொலிஸ் காவலரனொன்று அமைக்கப்படவேண்டுமென, வவுனியா தனியார் கல்வி நிலையங்களின் ஒன்றியம் கோரியுள்ளது.