3வது நாளாக தொடரும் உண்ணாவிரத போராட்டம்

-சண்முகம் தவசீலன்

முல்லைத்தீவு மாவட்டத்தின் கேப்பாப்பிலவு கிராம மக்கள் முன்னெடுத்துவரும் உண்ணாவிரத போராட்டம் இன்று சனிக்கிழமை மூன்றாவது நாளாகவும் தொடர்கிறது.

உண்ணாவிரத போராட்டம் நடைபெறுமிடத்துக்கு அரசியல் பிரமுகர்கள் பலர் வருகை தந்ததோடு எதிர்க்கட்ச்சி தலைவர் இரா.சம்மந்தன் தொலைபேசியூடாக தொடர்பு கொண்டு ஜனாதிபதியுடன் கலந்துரையாடுவதாக தெரிவித்ததாக, ஆர்ப்பாட்டக்காரர்கள் தெரிவித்தனர்.

இருப்பினும், இதுவரை மீள்குடியேற்ற அமைச்சரோ மாவட்ட செயலாளரோ ஜனாதிபதியினுடைய பிரதிநிதிகளோ எவரும் தம்மை வந்து பார்வையிடவோ எவ்வித பதிலையோ வழங்கவில்லை.
எனவே, ஜனாதிபதியினுடைய எழுத்து மூல உறுதிமொழி கிடைக்காவிட்டால், தொடர்ந்து உண்ணாவிரத போராட்டத்தில் ஈடுபடப்போவதாகவும் ஆர்ப்பாட்டக்காரர்கள் தெரிவித்தனர்.