அறிவியல் நகரில் உணவுக் களஞ்சியம் அமைக்கப்படவுள்ளது

-சுப்பிரமணியம் பாஸ்கரன்

கிளிநொச்சி, அறிவியல் நகர் பகுதியில் 300 மில்லியன் ரூபாய் செலவில் பாரிய உணவுக் களஞ்சியம் ஒன்று அமைக்கப்படவுள்ளதாக மாவட்ட உதவித் திட்டமிடல் பணிப்பாளர் அ.கேதீஸ்வரன் இன்று வியாழக்கிழமை (03) தெரிவித்தார்.

களஞ்சியம் அமைப்பதற்கான நிதியாக நிதியமைச்சரிடம் இருந்து 300 மில்லியன் ரூபாய் கிடைத்துள்ளது. மேலும், களஞ்சியம் அமைப்பதற்கான காணியும் அளவீடு செய்யப்பட்டுள்ளது.

கிளிநொச்சி மாவட்டத்தில் செய்கை பண்ணப்படும் நெல்லை விவசாயிகளிடம் இருந்து கொள்வனவு செய்வதில் பாரிய பிரச்சினைகள் காணப்படுகின்றன.

களஞ்சிய வசதிகள் இல்லாமையால் நெல்லை அரசாங்கம் கொள்முதல் செய்ய முடியாதுள்ளது. இந்த உணவுக் களஞ்சியம் அமைக்கப்பட்டால் நெல்லை விவசாயிகளிடமிருந்து பிரச்சினையின்றி கொள்முதல் செய்ய முடியும் என்றார்.