காணிகளை மீளப்பெற்றுக்கொள்ள நடவடிக்கை எடுக்க வேண்டும்

-நடராசா கிருஸ்ணகுமார்

முல்லைத்தீவு மாவட்டத்தில் அரச திணைக்களங்கள் மற்றும் நிறுவனங்களின் காணிகள் இராணுவத்தினரால் அபகரிக்கப்பட்டுள்ளன. அவற்றை மீளப் பெற்றுக்கொள்வதற்கு மாவட்டச் செயலாளரூடாக கோரவேண்டுமென வன்னி மாவட்ட நாடாளுமன்ற உறுப்பினரும் முல்லைத்தீவு மாவட்ட ஒருங்கிணைப்புக் குழுவின் இணைத்தலைவர்களில் ஒருவரான சி.சிவமோகன் தெரிவித்தார்.

முல்லைத்தீவு மாவட்ட ஒருங்கிணைப்புக் குழுக்கூட்டம் வியாழக்கிழமை (02) மாவட்டச் செயலகத்தில் நடைபெற்றது. இதன்போதே அவர் இவ்வாறு தெரவித்தார்.

அவர் மேலும் தெரிவிக்கையில்,

ஒருங்கிணைப்புக் குழுக் கூட்டம் மாவட்டத்துக்கு அத்தியாவசியமானது. இவ்வாண்டில் நாங்கள் இரண்டாவது கூட்டத்தில் கூடியுள்ளோம். இக்கூட்டத்தில் பல நிர்வாகப் பிரச்சனைகளை தீர்க்க வேண்டியுள்ளோம்.

அரச காணிகள், நிறுவனங்களுடைய காணிகள் உட்பட பலவிடங்களில் இராணுவத்தினரால் காணிகள் அபகரிக்கப்பட்டுள்ளன. நிறுவனங்கள், திணைக்களங்கள் பறிகொடுத்த காணிகளை மீள எழுத்துமூலம் கோரவில்லையென்றே நினைக்கின்றேன்.

பொது நிறுவனங்கள், அரச நிறுவனங்களுக்கான காணிகளை அனைத்து அரச திணைக்கள தலைவர்களும் மாவட்டச் செயலர் மூலம் எழுத்துமூலம் கோரவேண்டுமெனவும் தெரிவித்தார்.