கேப்பாபுலவு மக்கள் கவனயீர்ப்பு போராட்டம்

சுப்பிரமணியம் பாஸ்கரன், நடராசா கிருஸ்ணகுமார்

இராணுவம் ஆக்கிரமித்துள்ள தமது நிலங்களை மீள தம்மிடம் ஒப்படைக்க வலியுறுத்தி கேப்பாபுலவு மக்கள் கவனயீர்ப்பு போராட்டத்தில் ஈடுபட்டுள்ளனர்.

புதன்கிழமை (25) முல்லைத்தீவுக்கு ஜனாதிபதி வருகை தருவதாக தெரிவிக்கப்பட்டதையடுத்து கேப்பாபுலவு மக்கள் ஜனாதிபதியின் கவனத்தை ஈர்க்கும் பொருட்டு இப்போராட்டத்தில் ஈடுபட்டுள்ளனர். எனினும், தெரிவிக்கப்பட்டவாறு ஜனாதிபதி வருகை தரவில்லை.

கேப்பாபுலவு பகுதியில் குடியிருந்த மக்களை யுத்தத்தின் பின்னரான மீள்குடியேற்றத்தின் போது சூரியபுரம் பகுதியில் கேப்பாபுலவு எனும் மாதிரி கிராமத்தை உருவாக்கி அங்கு குடியேற்றினர். அக்கிராமத்தில் அடிப்படை வசதிகள் எவையும் இல்லை. இந்நிலையில் தமது சொந்த கிராமத்தில் தம்மை மீள் குடியேற்றுமாறும் தம்முடைய கிராமத்தை விடுவிக்குமாறும் கோரி, மக்கள் பல்வேறு போராட்டத்தில் ஈடுபட்ட போதும் அவர்களுடைய சொந்த நிலங்கள் இன்னமும் விடுவிக்கப்படவில்லை.

போராட்டத்தில் ஈடுபட்ட மக்கள் வடமாகாணசபை உறுப்பினர் துரைராசா ரவிகரன் ஊடாக முல்லைத்தீவு மாவட்டச்செயலரிடம் ஜனாதிபதிக்கான மகஜரையும் இன்று (25) காலை கையளித்துள்ளனர்.