தென்னஞ்செய்கைக்கு ஊக்குவிப்பு வேண்டும்

நடராசா கிருஸ்ணகுமார்

கிளிநொச்சி, பச்சிலைப்பள்ளியில் மீளக்குடியமர்ந்துள்ள குடும்பங்களுக்கு, உதவி அமைப்புகள், தென்னங்கன்றுகளை வழங்கி, தென்னஞ்செய்கையினை ஊக்குவிக்க வேண்டுமென, இப்பகுதிப் பொது அமைப்புகள் கோரிக்கை விடுத்துள்ளன.

கடந்த காலப் போரினால் தென்னை வளம் கொண்ட பச்சிலைப்பள்ளியின் பல்லாயிரக்கணக்கான தென்னைகள் அழிவடைந்துள்ள நிலையில், மீள்குடியேற்றத்தின் பின்னர் அரசாங்கத்தினரதும் தனியாரினதும் பல தென்னந் தோட்டங்கள் உருவாக்கப்பட்டு வருகின்றன.

இருந்த போதிலும், பல குடும்பங்கள், தங்களுடைய தென்னைகள் அழிவடைந்த இடத்தில் தென்னைகளை மீள் நடுகை செய்ய முடியாதளவுக்குப் பாதிப்படைந்து நிலையில் காணப்படுகின்றன.

இந்நிலையில், பிரதேச செயலகத்தினாலோ அல்லது உதவி அமைப்புகளினாலோ ஒவ்வொரு குடும்பமும் தென்னஞ்செய்கையில் ஈடுபடுவதற்கு திட்டங்கள் வகுக்கப்பட்டு, தென்னங்கன்றுகள் வழங்கி ஊக்குவிப்பு உதவிகளையும் வழங்குமாறு, பச்சிலைப்பள்ளில் மீளக்குடியமர்ந்துள்ள குடும்பங்கள் சார்பாக பொது அமைப்புகள் கோரிக்கை விடுத்துள்ளன.