லிபிய ஆர்ப்பாட்டத்தில் பலியானவர்களின் எண்ணிக்கை 104ஆக உயர்வு

லிபியாவில் இடம்பெற்று வரும் அரசாங்கத்திற்கு எதிரான ஆர்ப்பாட்டத்தின்போது, பலியானவர்களின் எண்ணிக்கை 104ஆக உயர்வடைந்துள்ளது.

பெங்காஸி நகரில் நேற்று சனிக்கிழமை இடம்பெற்ற ஆர்ப்பாட்டத்தின்போது, படையினரின் பாரிய தாக்குதலுக்கு இலக்காகி உயிரிழந்தவர்களில் 20 பொதுமக்கள் அடங்குவதாக மனித உரிமைகளுக்கான கண்காணிப்பு அமைப்பு தெரிவித்தது.

லிபியாவில் 42 வருடகாலமாக ஆட்சி செய்கின்ற கேணல் முவம்மர்; கடாபிக்கு எதிராக  லிபியாவின் கிழக்குப் பகுதியைச் சேர்ந்த ஆயிரக்கணக்கான மக்கள் ஆர்ப்பாட்டத்தில் ஈடுபட்டு வருகின்றனர்.

ஆர்ப்பாட்டக்காரர்கள் மீது படையினர் துப்பாக்கிச் சூடு, மோட்டார்த் தாக்குதல்கள், ஆயுதத் தாக்குதல்கள் ஆகியவற்றை மேற்கொள்வதாக சம்பவத்தை நேரில் கண்ட சாட்சியங்கள் தெரிவித்துள்ளன.

காயமடைந்த நிலையில் 150 பொதுமக்கள் வைத்தியசாலையில் அனுமதிக்கப்பட்டுள்ளதாகவும் இவர்களில் 22 பேர் நேற்று சனிக்கிழமை உயிரிழந்துள்ளதாகவும் வைத்தியர் ஒருவர் தெரிவித்துள்ளார். மேலும் பலரின் நிலைமை கவலைக்கிடமாக இருப்பதாகவும் அவ் வைத்தியர் கூறினார்.

இதற்கிடையில், வெளிநாட்டு ஊடகவியலாளர்கள் செய்தி சேகரிக்கும் பணியில் ஈடுபடுவதற்கு லிபிய நாட்டு அதிகாரிகள் அனுமதியளிக்கததால் தகவல்களை உறுத்திப்படுத்துவதில் சிரமமாகவுள்ளதாகவும்  தெரிவிக்கப்படுகிறது.