விபத்தில் மாணவி படுகாயம்; சாரதி கைது

ரஞ்சித் ராஜபக்ஷ

ஹட்டன் - நுவரெலியா பிரதான வீதி, கொட்டகலை நகரில், இன்று (18) இடம்பெற்ற விபத்தில், பாடசாலை மாணவி ஒருவர் படுகாயமடைந்த நிலையில், நுவரெலியா மாவட்ட வைத்தியசாலையில் அனுமதிக்கப்பட்டுள்ளார்.

ஹட்டனிலிருந்து - தலவாக்கலை நோக்கிப் பயணித்த காரொன்றில் மோதுண்டே மேற்படி மாணவி காயமடைந்துள்ளார்.

ஹட்டனிலுள்ள பாடசாலையொன்றில் கல்வி பயிலும் மேற்படி மாணவி, பாடசாலை முடிந்து வீடு செல்ல முற்பட்டபோதே, விபத்தை எதிர்கொண்டுள்ளார்.

விபத்தில் காயமடைந்த மாணவி, கொட்டகலை வைத்தியசாலையில் அனுமதிக்கப்பட்டு, மேலதிக சிகிச்சைக்காக நுவரெலியா மாவட்ட வைத்தியசாலைக்கு மாற்றப்பட்டுள்ளார்.

சம்பவத்துடன் தொடர்புடைய காரின் சாரதியைக் கைதுசெய்துள்ள பொலிஸார், மேலதிக விசாரணைகளை மேற்கொண்டு வருகின்றனர்.