பஸ்ஸில் ஜப்பானிய பெண்ணை பாலியல் தொந்தரவுக்குள்ளாக்கிய நபருக்கு ஒத்திவைக்கப்பட்ட சிறைத்தண்டனை

(லக்மால் சூரியகொட)

பஸ்ஸில் பயணம் செய்த ஜப்பானிய பெண்ணை பாலியல் தொந்தரவு செய்த குற்றச்சாட்டை ஒப்புக்கொண்ட நபர் ஒருவருக்கு கொழும்பு கோட்டை நீதவான் லங்கா ஜயரட்ன, 7 வருடங்களுக்கு  ஒத்திவைக்கப்பட்ட 8 மாதகால சிறைத்தண்டனை விதித்து தீர்ப்பளித்தார்.

இந்நபருக்கு 1500 ரூபா அபராதமும் விதித்த நீதிபதி, இந்நபரின் கைவிரல் ரேகையை பதிவுசெய்யுமாறு பொலிஸாருக்கு உத்தரவிட்டார்.

கொழும்பு 2, யூனியன் பிளேஸ் பகுதியில் பஸ்ஸில் பயணம் செய்தபோது இந்நபர் தன்னை பாலியல் தொந்தரவுக்குட்படுத்தியதாக மேற்படி ஜப்பானிய பெண் புகார் செய்திருந்தார்.

குருநாகல் நாரம்மலயைச் சேர்ந்த அப்துல் அமானுல்லா எனும் இந்நபர் நீதிமன்றில் சிறைச்சாலை அதிகாரிகளால் ஆஜர்படுத்தப்பட்டபோது அவர் அனைத்து குற்றச்சாட்டுகளையும்  ஒப்புக்கொள்வதாக அவரின் சட்டத்தரணி நீதிமன்றில் தெரிவித்ததுடன் அவருக்கு குறைந்த தண்டனை விதிக்குமாறும் கோரினார்.

தனது கட்சிக்காரர் திருமணமாகியவர் எனவும் ஒரு பிள்ளையின் தந்தை எனவும் அச்சட்டத்தரணி கூறினார்.

பஸ்ஸில் தனக்கு அருகில் அமர்ந்து பயணம் செய்த அந்நபர் தன்னை பாலியல் ரீதியில் தொந்தரவு செய்ததாகவும் தகாதமுறையில் தொட்டதாகவும் மேற்படி ஜப்பானிய பெண் முறைப்பாட்டில் தெரிவித்திருந்தார். தான் குறுகிய கால விடுமுறையில் இலங்கைக்கு வந்ததாகவும் அவர் கூறியிருந்தார்.

விசாரணைகளின்போது குற்றஞ்சுமத்தப்பட்ட நபர், மதுபோதையில் இக்குற்றங்களை மேற்கொண்டிருப்பது தெரியவந்தது.