பாதசாரிக் கடவையை பயன்படுத்தாமல் வீதியை கடந்த 80 பேருக்கு அபராதம்

(ரி.பாருக் தாஜுதீன்)

பாதசாரிக் கடவை அல்லாத இடங்களில் வீதியை கடந்த எண்பதுக்கும் மேற்பட்ட பாதசாரிகளுக்கு இன்று புதன்கிழமை கொழும்பு வாகன போக்குவரத்து நீதிபதி தலா 100ரூபா அபராதம் விதித்தார்.

தவறான இடத்தில் வீதியை கடந்த குற்றத்தை ஒப்புக்கொண்ட பாதசாரிகளை நகர வாகனப் போக்கு வரத்து பொலிஸ் மற்றும் முகத்துவார பொலிஸார், கொழும்பு வாகன போக்குவரத்து நீதிபதி ஜெயராம் ட்றெஸ்கி முன்னிலையில் ஆஜர் செய்தனர்.

இவர்கள் உரிய இடத்தில் வீதியை கடக்காமல் கண்ட இடங்களிலும் வீதியை கடந்து தமது உயிருக்கு ஆபத்தையும் வீதியில் வாகன நெருக்கடியையும் தோற்றுவித்ததாக பொலிஸார் இதன்போது முறையிட்டனர்.

இவ்வாறான குற்றமிழைத்தோரை நீதிமன்றுக்கு கொண்டு வருவதனால் நீதிமன்றில் நெருக்கடி ஏற்பட்டு முக்கிய வழக்குகளின் விசாரணைகள் தாமதப்படுவதாக நீதிவான் கூறினார். அவர் வீதி சட்டங்கள் பற்றிய விழிப்புணர்வு வகுப்புகளை மீண்டும் ஆரம்பிக்கும்படி பொலிஸாருக்கு ஆலோசனை வழங்கினார்.