மாகாண சபை உறுப்பினர் பிரசாந்தன் பிணையில் விடுதலை

(எல்.லோஹித்)

பிடிவிறாந்து பிறப்பிக்கப்பட்ட நிலையில் காத்தான்குடி பொலிஸில் சரணடைந்த கிழக்கு மாகாண சபை உறுப்பினர் பூ.பிரசாந்தன் பிணையில் செல்ல அனுமதிக்கப்பட்டுள்ளார்.

இன்று காலை சரணடைந்த பிரசாந்தனும் மற்றும் 5 பேரும் இன்று மட்டக்களப்பு நீதவான் என்.எம்.அப்துல்லா முன்னிலையில்  ஆஜர்படுத்தப்பட்டனர்.

அப்போது, தலா ஒரு லட்சம் ரூபா பெறுமதியான இரண்டு சரீரப் பிணையில் செல்ல பிரசாந்தனுக்கு நீதவான் அனுமதி வழங்கினார்.

ஏனைய 5 பேரையும் 24 ஆம் திகதி வரை விளக்கமறியல் வைக்குமாறு அவர் உத்தரவு வழங்கினார்.

ஆரையம்பதி பிரதேச செயலாளரை அச்சுறுத்தியமை, கிராம சேவையாளர் சுரேஷை அச்சுறுத்தியமை, ஆரையம்பதி பிரதேச செயலக ஊழியர் பைரூஸை தாக்கியமை ஆகிய 3 குற்றச்சாட்டுகள் இவர்கள் மீது சுமத்தப்பட்டுள்ளன.

இவ்வழக்கு எதிர்வரும்  24 ஆம் திகதி மீண்டும் விசாரிக்கப்படவுள்ளது. சந்தேக நபர்கள் சார்பில் சட்டத்தரணி யூ.அப்துல் நஜீம் ஆஜராகியிருந்தார்.