'அலிசாஹிர் மௌலானவை கிழக்கு மாகாண அமைச்சராக்க ஆசைப்பட்டேன்'

(எம்.சுக்ரி)

அலிசாஹிர் மௌலானவை அடுத்த கிழக்கு மாகாண அமைச்சராக்க ஆசைப்பட்டிருந்தேன் என ஸ்ரீலங்கா முஸ்லிம் காங்கிரஸின் தவிசாளரும் பிரதியமைச்சருமான பசீர் சேகுதாவூத் தெரிவித்தார்.

ஏறாவூரில் நேற்று வெள்ளிக்கிழமை நடைபெற்ற ஸ்ரீலங்கா முஸ்லிம் காங்கிரஸின் தேர்தல் பிரச்சாரக் கூட்டத்தில் உரையாற்றும் போதே பிரதியமைச்சர் மேற்கண்டவாறு குறிப்பிட்டார்.

அங்கு தொடர்ந்து உரையாற்றிய அவர்,

அடுத்த கிழக்கு மாகாண சபை தேர்தலில் அலிசாஹிர் மௌலானவை வேட்பாளராக நிறுத்தாமல் அவரை ஏறாவூர் நகர சபையுடன் மட்டுப்படுத்தி முடக்கிவிடும் தந்திரத்தை மேற்கொண்டு அவரை அரசியலில் இருந்து ஓரங்கட்டுவதற்கான சதியினை அமைச்சர் றிசாட் பதியுதீன் மற்றும் முன்னாள் அமைச்சர் அமீர் அலி ஆகியோர் செய்துள்ளனர்.

அலிசாஹிர் மௌலானாவின் முகத்தை காட்டி வாக்குகளை பெற்றுக்கொண்டு அவரை ஓரம் கட்டுவதற்கான முயற்சியிலேயே இந்த தேர்தலை ஏறாவூரில் இவர்கள் பயன்படுத்துகின்றனர்.

அலிசாஹிர் மௌலானா இந்த தேர்தலில் ஒதுங்குமாறும் அல்லது அமைதியாகுமாறும் நான் அவரை கேட்கின்றேன்.

அடுத்த கிழக்கு மாகாண சபை தேர்தலில் அலிசாஹிர் மௌலானாவை வேட்பாளராக நிறுத்தி அவரை வெற்றியடைய செய்து மாகாண அமைச்சராக ஆக்குவதற்கு என்னாலான அனைத்து முயற்சிகளையும் மேற்கொள்வேன் என்றார்.