யாழ். நகரில் கலாசார சீரழிவுகளைத் தடுக்க பொலிஸார் நடவடிக்கை எடுக்கவேண்டும்

(சங்கவி)

யாழ். நகரப்பகுதிகளில் இடம்பெற்றுவரும் கலாசாரச் சீரழிவுகளைத் தடுத்து நிறுத்துவதற்கு பொலிஸாரின் ஒத்துழைப்பு மிகவும் அவசியம். இதற்குரிய நடவடிக்கைகளைப் பொலிஸார் துரிதகதியில் மேற்கொள்ள வேண்டும் என்று யாழ். மாநகர சபையின் உறுப்பினர் எஸ். விஜயகாந் பொலிஸாரிடம் கோரிக்கை விடுத்துள்ளார்.

இது தொடர்பான மகஜர் ஒன்றை யாழ். பொலிஸ் நிலையத் தலைமைப் பொறுப்பதிகாரியிடம் அவர் கைளித்துள்ளார். இந்த மகஜரில் தெரிவிக்கப்பட்டுள்ளதாவது:

யாழ்ப்பாணத்தின் கலாசாரம் பாதிக்கப்படுவதற்கு எப்போதும் அனுமதியளிக்கக் கூடாது. எமது மக்களின் பண்பாடு, கலாசாரம் என்பன கட்டிக் காக்கப்படவேண்டும். அண்மைக்காலமாக இது சீர்குலைந்து செல்வதாக பல்வேறு தரப்பினரிடம் இருந்தும் கருத்துகள் வெளியாகிக் கொண்டிருக்கின்றன.

எனவே, இவ்வாறு யாழ்ப்பாணத்தின் பண்பாட்டைச் சீரழிக்கும் வகையில் இடம்பெறுவதாகக் கூறப்படும் கலாசாரச் சீரழிவுகளை தடுத்து நிறுத்துவதற்குத் தங்கள் ஒத்துழைப்பு அவசியம்- என்று தெரிவிக்கப்பட்டுள்ளது.