வடக்கில் தொடர்ந்தும் ஐ.சி.ஆர்.சி.யின் பணிகள்

(கவிசுகி)

வடக்கிலுள்ள பணியகங்கள் மூடப்பட்டாலும் அங்கு தமது செயற்பாடுகள் தொடர்ந்தும் மேற்கொள்ளப்படுமென செஞ்சிலுவைக் குழுவின் ஊடகப் பேச்சாளர் சரசி விஜேரட்ன தெரிவித்துள்ளார்.

எதிர்வரும் மார்ச் மாதம் 31ஆம் திகதி யாழ்ப்பாணம் மற்றும் வவுனியாவிலுள்ள அனைத்துலக செஞ்சிலுவைச் சங்கத்தின் பணியகங்களை மூடுவதற்கு முடிவு செய்யப்பட்டுள்ளதாகத் தெரிவித்த அவர், இந்தப் பணியகங்கள் மூடப்பட்ட பின்னரும் கொழும்பிலிருந்து அது தொடர்ந்தும் ஒருங்கிணைக்கப்படுமெனவும் கூறினார்.

வடக்கிலுள்ள பணியகங்கள் மூடப்பட்டாலும் யாழ்ப்பாணத்தில் செஞ்சிலுவைக் குழுவின் உதவியுடன் மேற்கொள்ளப்பட்டு வரும் ஜெய்ப்பூர் உடல் உறுப்புகளை இழந்தோருக்கான புனர்வாழ்வு நிலையத்தின் பணிகளும் தடுப்பு முகாம்களில் உள்ளவர்களைப் பார்வையிடச் செல்லும் அவர்களின் குடும்பத்தினருக்கான உதவிகளும் தொடர்ந்தும் வழங்கப்படுமெனவும் சரசி விஜேரட்ன குறிப்பிட்டார்.