சுகாதாரமற்ற முறையில் உணவுகள் தயாரிப்பு; வியாபாரிகளுக்கு எதிராக வழக்குத் தாக்கல் செய்ய நடவடிக்கை

(நவரத்தினம்)

வவுனியா கொரப்பத்தானை வீதியிலுள்ள கட்டண குளியல் அறை மற்றும் மலசலகூடம் அமைந்துள்ள வளாகத்தில் தயாரிக்கப்பட்டதாகத் தெரிவிக்கப்படும்  உணவுப்பொருட்களையும் உணவுப்பொருட்களை தயாரிப்பதற்காக பயன்படுத்தப்படும் உபகரணங்கள் மற்றும் தள்ளுவண்டில்களையும் நகரசபையின் பொதுசுகாதார பரிசோதகர் அடங்கிய குழுவினர் கைப்பற்றியுள்ளனர்.

கொரப்பத்தானை வீதியிலுள்ள கட்டண குளியல் அறை மற்றும் மலசலகூடம் அமைந்து வளாகத்தில் வீதியோர வியாபாரிகளால் உணவுப்பொருட்கள் தயாரிக்கப்படுவதாக நேற்று வியாழக்கிழமை கிடைத்த தகவலையடுத்து, நகரசபையின் பொது சுகாதார பரிசோதகர் அடங்கிய குழுவினர் சோதனை நடவடிக்கையில் ஈடுபட்டபோது மேற்கண்டவற்றை கைப்பற்றியுள்ளனர்.

இந்த வியாபாரிகளுக்கு எதிராக வழக்குத்தாக்கல் செய்வதற்கு நடவடிக்கை எடுக்கப்பட்டுள்ளதாக வவுனியா நகரசபையின் சுகாதாரப் பிரிவு தெரிவித்தது.