ரஷ்ய வான் தாக்குதல்களில் இட்லிப்பில் ஆயுதக்குழு உறுப்பினர்கள் 50 பேர் பலி

வட சிரியாவில் பிரதானமாக எதிரணியின் கட்டுப்பாட்டிலுள்ள இட்லிப் மாகணத்தில் ரஷ்ய வான் தாக்குதல்களில் 50க்கும் மேற்பட்ட துருக்கியால் ஆதரவளிக்கப்பட்ட ஆயுதக்குழு உறுப்பினர்கள் கொல்லப்பட்டதாக அறிக்கைகள் தெரிவிக்கின்றன. 

இதேவேளை, குறித்த தாக்குதலில் மேலும் பலர் காயமடைந்துள்ளனர். 

பய்லக் அல்-ஷாம் என்றழைக்கப்படும் இஸ்லாமிய ஆயுதக்குழுவொன்றுக்கான பயிற்சி முகாமொன்றே தாக்கப்பட்டுள்ளது. 

இந்நிலையில், 78 பேர் உயிரிழந்ததாக பிரித்தானியாவைத் தளமாகக் கொண்ட மனித உரிமைகளுக்கான சிரியக் கண்காணிப்பகம் தெரிவித்துள்ளது. 

இதேவேளை, காயமடைந்த சிலர் மோசமான நிலையில் இருப்பதாகவும், உயிரிழந்தோர் எண்ணிக்கையானது அதிகரிக்கலாம் என கண்காணிப்பகம் மேலும் கூறியுள்ளது. 
இட்லிப் நகரத்துக்கு வடமேற்காகவுள்ள ஹரெம் பிராந்தியத்திலேயே இத்தாக்குதல் இடம்பெற்றிருந்தது.