ஜனாதிபதிக்கு தேர்தல்கள் ஆணைக்குழு விடுத்துள்ள அறிவிப்பு

நாட்டின் தற்போதைய நிலைமையின் கீழ், அரசமைப்பில் குறிப்பிடப்பட்டுள்ள விடயங்களுக்கு அமைவாக, பொதுத் தேர்தல் நடத்தப்பட வேண்டிய திகதி குறித்து, சிக்கல் ஏற்பட்டுள்ளமையால் அதனை தீர்ப்பதற்காக உயர்நீதிமன்றத்தின் ஆலோசனைகளைப் பெற்றுக்கொள்வது ஏற்புடையதென தேசிய தேர்தல்கள் ஆணைக்குழு ஜனாதிபதிக்கு அறிவித்துள்ளது.

நேற்று தேர்தல்கள் ஆணைக்குழுவில் நடைபெற்ற கலந்துரையாடலையடுத்து, ஜனாதிபதியின் செயலாளருக்கு அனுப்பி வைக்கப்பட்டுள்ள கடிதத்திலேயே இந்த விடயம் குறிப்பிடப்பட்டுள்ளது.

கொரோனா தொற்று காரணமாக, இந்த மாதம் 25ஆம் திகதி நடைபெறவிருந்த பொதுத்தேர்தல் பிற்போடப்பட்டதுடன், மே மாதம் 14ஆம் திகதிக்குப் பின்னரான நாளொன்றில் தேர்தலை நடத்த முடியுமென ஆணைக்குழு முன்னதாக அறிவித்து இருந்த நிலையிலேயே, தேர்தல் நடத்தப்பட வேண்டிய திகதி குறித்து உயர்நீதிமன்றின் ஆலோசனைகளைப் பெற்றுக்கொள்ளுமாறு, தேர்தல்கள் ஆணைக்குழு ஜனாதிபதிக்கு அறிவித்துள்ளது.