ஜோக்கோவிச்சை வென்று சம்பியனானார் ஸவ்ரேவ்

ஐக்கிய இராச்சியத்தின் தலைநகர் இலண்டனில் இடம்பெற்றுவந்த தொழில்முறை டென்னிஸ் வீரர்கள் சங்க இறுதிப் போட்டிகள் தொடரில் உலகின் ஐந்தாம் நிலை வீரரான ஜேர்மனியின் அலெக்ஸான்டர் ஸவ்ரேவ் சம்பியனானார்.

நேற்றிரவு இடம்பெற்ற இறுதிப் போட்டியில், உலகின் முதல்நிலை வீரரான சேர்பியாவின் நொவக் ஜோக்கோவிச்சை 6-4, 6-3 என்ற நேர் செட்களில் வீழ்த்தியே ஒரு மணித்தியாலம் 19 நிமிடங்கள் நீடித்த போட்டியில் ஸவ்ரேவ் சம்பியனாகியிருந்தார்.

தனது குழுநிலைப் போட்டியில் ஜோக்கோவிச்சிடம் தோற்றிருந்த ஸவ்ரேவ், தனது அரையிறுதிப் போட்டியில் உலகின் மூன்றாம் நிலை வீரரான சுவிற்ஸர்லாந்தின் ரொஜர் பெடரை 7-5, 7-6 (7-5) என்ற நேர் செட்களில் வென்றே இறுதிப் போட்டிக்குத் தகுதிபெற்றிருந்தார். மறுபக்கமாக, உலகின் ஆறாம் நிலை வீரரான தென்னாபிரிக்காவின் கெவின் அன்டர்சனை 6-2, 6-2 என்ற நேர் செட்களில் தோற்கடித்தே இறுதிப் போட்டிக்கு ஜோக்கோவிச் தகுதிபெற்றிருந்தார்.