விம்பிள்டன் அரையிறுதியில் வீனஸ், கொன்டா

விம்பிள்டன் டென்னிஸ் சம்பியன்ஷிப் தொடரில், பெண்கள் ஒற்றையர் அரையிறுதிப் போட்டிகளுக்கு, வீனஸ் வில்லியம்ஸ், ஜொஹன்னா கொன்டா, கார்பைன் முகுருஸா ஆகியோர் தகுதிபெற்றுள்ளனர்.

விம்பிள்டனை இதுவரை 5 தடவைகள் கைப்பற்றியுள்ள வீனஸ் வில்லியம்ஸ், விம்பிள்டன் போட்டிகளில் தனது 100ஆவது ஒற்றையர் போட்டியில், பிரெஞ்சுப் பகிரங்க டென்னிஸ் சம்பியனான லத்வியாவின் ஜெலீனா ஒஸ்தபென்கோவை எதிர்கொண்டார்.

முதலாவது செட்டை 6-3 என்ற கணக்கில் இலகுவாகக் கைப்பற்றிய வீனஸ், 2ஆவது செட்டை, சற்றுப் போராடி, 7-5 என்ற புள்ளிகள் கணக்கில் கைப்பற்றி, நேர் செட் கணக்கில், அரையிறுதிக்குத் தகுதிபெற்றார்.

2ஆம் நிலை வீராங்கனையான றோமானியாவின் சிமோனா ஹலெப், 6ஆம் நிலை வீராங்கனையான பெரிய பிரித்தானியாவின் ஜொஹன்னா கொன்டாவை எதிர்கொண்டார். இதில், முதலாவது செட்டை 7-6 என்ற புள்ளிகள் கணக்கில் கைப்பற்றிய ஹலெப், அடுத்த 2 செட்களையும் 6-7, 4-6 என்ற புள்ளிகள் கணக்கில் தோற்று, வெளியேறினார்.

7ஆம் நிலை வீராங்கனையான ரஷ்யாவின் ஸ்வெட்லானா குஸ்னெட்ஸோவா, 14ஆம் நிலை வீராங்கனையான ஸ்பெய்னின் கார்பைன் முகுருஸாவை எதிர்கொண்டார். இதில், 6-3, 6-4 என்ற நேர் செட் கணக்கில், முகுருஸா வெற்றிபெற்று, அரையிறுதிக்குத் தகுதிபெற்றார்.

மற்றுமொரு காலிறுதிப் போட்டியில், 24ஆம் நிலை வீராங்கனையான ஐ.அமெரிக்காவின் கொகோ வன்டெவெகே, தொடருக்காகத் தரநிலைப்படுத்தப்படாத, ஸ்லோவாக்கியாவின் மக்டலீனா றைபரிக்கோவாவை எதிர்கொண்டார். இதில், 6-3, 6-3 என்ற நேர் செட் கணக்கில் இலகுவாக வெற்றிபெற்ற மக்டலீனா, அரையிறுதிக்குத் தகுதிபெற்றார்.