இராணுவ அணிநடை கண்காட்சி

இலங்கை இராணுவப் படைப்பிரிவின் 56ஆவது ஆண்டு நிறைவை முன்னிட்டு, இராணுவத்தினர் ஏற்பாடு செய்த இராணுவ அணிநடை கண்காட்சி, அக்கரைப்பற்று பிரதேசத்தில் இன்று (06) நடைபெற்றது.

இராணுவத்தின் ஒழுக்கம், நேர முகாமைத்துவம், தலைமைத்துவம் போன்ற  நற்பண்புகளை, பொதுமக்களும் அறிந்துகொள்ளும் வகையிலும், எதிர்வரும் 10ஆம் திகதி கொண்டாடப்படவிருக்கும் இராணுவ ஆண்டு நிறைவு விழாவை முன்னிட்டும், குறித்த அணிநடை கண்காட்சி ஏற்பாடு செய்யப்பட்டிருந்தது.

இலங்கை இராணுவத்தின் 24ஆவது படைப்பிரிவின் மேஜர் ஜென்ரல் மஹிந்த முதலிகேவின் பணிப்புரையின் கீழ், அக்கரைப்பற்று இராணுவ முகாம் கட்டளையிடும் அதிகாரியும் 241ஆம்,242ஆம் படைப்பிரிவுகளுக்குப் பொறுப்பானவருமான கேணல் விபுல சந்திரசிறியின் ஒழுங்கமைப்பில் இந்த அணிவகுப்பு இடம்பெற்றது.

அக்கரைப்பற்று ஸ்ரீ விஜயராம விகாரையில் இருந்து ஆரம்பமான அணிநடை கண்காட்சி, அக்கரைப்பற்று சந்தை சதுக்கத்தின் ஊடாக மணிக்கூட்டுக் கோபுரத்தை அடைந்து, அங்கிருந்து கல்முனை பிரதான வீதியூடாக தொழில்நுட்ப கல்லூரியை அடைந்து நிறைவுற்றது.

அணிநடை கண்காட்சியில் 23ஆம் படைப்பிரிவின் சிங்கபா ரெஜிமென்ட் 3ஆம் படைப்பிரிவின் விஜயபா ரெஜிமென்ட், 8ஆம், 11ஆம்,16ஆம் படைப்பிரிவுகளின் இலங்கை காட் பட்டலியன் உள்ளிட்ட இராணுவ அணிகள் பங்கேற்றன