பாண்டிருப்பு கடற்கரை வீதிக்கு நிதியொதுக்கீடு

கல்முனை மாநகர சபைக்குட்பட்ட பாண்டிருப்புக் கிராமத்தின் கடற்கரை வீதி அபிவிருத்திக்கு, நகரத் திட்டமிடல், நீர் வழங்கல், வடிகாலமைப்பு அமைச்சர் ரவூப் ஹக்கீம், தனது அமைச்சின் மூலம் ஒன்பது மில்லியன் ரூபாய் நிதியை ஒதுக்கீடு செய்துள்ளார்.

கல்முனை மாநகர சபையின் ஐக்கிய தேசியக் கட்சி உறுப்பினர் புவனேஸ்வரி விநாயகமூர்த்தி விடுத்த வேண்டுகோளின் பேரில், அரச தொழில் முயற்சி மற்றும் கண்டி நகர அபிவிருத்திப் பிரதியமைச்சர் சட்டத்தரணி எச்.எம்.எம்.ஹரீஸின் ஆலோசனையுடன், கல்முனை மாநகர மேயர் ஏ.எம்.றகீப், அமைச்சர் ரவூப் ஹக்கீமிடம் இந்நிதியொதுக்கீட்டுக்கான பரிந்துரையை மேற்கொண்டிருந்தார்.

இவ்வேலைத் திட்டம், புவனேஸ்வரி விநாயகமூர்த்தி ஊடாக முன்னெடுக்கப்படவுள்ளது.

அடுத்த ஒரு சில தினங்களில் மாநகர மேயரால், இவ்வீதி அபிவிருத்திப் பணி ஆரம்பித்து வைக்கப்படுமென, ஐக்கிய தேசியக் கட்சியின் பாண்டிருப்பு பிரதேச அமைப்பாளர் எம்.விநாயகமூர்த்தி தெரிவித்தார்.