யானைகளின் தாக்குதலுக்குள்ளாகி வீடு சேதம்

(ஹனீக் அஹமட்)

அட்டாளைச்சேனை பிரதேச செயலகத்துக்குட்பட்ட அஷ்ரப் நகர் பகுதியில் நேற்று திங்கட்கிழமை இரவு யானைகளின் தாக்குதலுக்குள்ளாகி வீடொன்று பாரிய சேதத்துக்குள்ளாகியுள்ளது.

அப்துல் சலாம் முஹம்மது முஸ்தபா என்பவரின் வீடே – யானைகள் தாக்கியதில் இவ்வாறு சேதத்துக்குள்ளானது.

இந்த சம்பவம் குறித்து முஸ்தபாவின் மனைவி விபரிக்கையில்,

'நேற்று இரவு 8.00 மணியிருக்கும். நாங்கள் வீட்டிலிருந்தோம். அப்போது எங்கள் வளவுக்குள் மூன்று யானைகள் நுழைந்தன. அவற்றில் இரண்டு யானைகள் எங்கள் வீட்டினை இடித்துத் தள்ளியதோடு, சுற்றியிருந்த மரங்களையும் வேறோடு பிடிங்கி எறிந்தன.

 நல்ல வேளையாக, நாங்கள் அருகிலிருந்த வீட்டுக்குத் தப்பிச் சென்று விட்டோம். முன்னரும் எங்கள் வீடு யானைகளால் சேதப்படுத்தப்பட்டது. ஆனால், அதற்கான எவ்வித நஷ்டஈடுகளும் எமக்குக் கிடைக்கவில்லை. இந்த நிலையில்தான் மீண்டும் யானைகளால் எமது வீடு அழிவடைந்துள்ளது' என்றார்.

இதேவேளை, அஷ்ரப் நகர் பகுதியில் யானைகளால் ஏற்படும் பாதிப்பிலிருந்து தமக்கு தகுந்த பாதுகாப்புகளை வழங்கும்படி இப்பகுதி மக்கள் கோரிக்கை விடுக்கின்றனர்.