ஆலங்குளம் பாவங்காய் வீதியின் பெயரை மாற்றுமாறு வேண்டுகோள்

-பைஷல் இஸ்மாயில்

அட்டாளைச்சேனை- ஆலங்குளம் பாவங்காய் வீதிக்கு, முன்னாள் பொத்துவில் தொகுதி நாடாளுமன்ற உறுப்பினர் மர்ஹும் டாக்டர் ஜலால்தீனுடைய ஞாபகார்த்தமாக, டாக்டர் ஜலால்தீன் பெருந்தெரு என பெயர் சூட்டுவதற்கான நடவடிக்கைகளை எடுக்குமாறு ஸ்ரீலங்கா முஸ்லிம் காங்கிரஸின் முன்னாள் அட்டாளைச்சேனை இளைஞர் காங்கிரஸ் அமைப்பாளரும் அட்டாளைச்சேனை ஸ்ரீலங்கா முஸ்லிம் காங்கிரஸ் கட்சியின் மத்திய குழுவின் ஆலோசகர்களில் ஒருவருமான இக்பால் எம் யூசுப் அட்டாளைச்சேனைப் பிரதேச சபை தவிசாளரிடமும் கிழக்கு மாகாண சபை உறுப்பினர் ஏ.எல்.எம்.நஸீரிடமும் வேண்டுகோள்  விடுத்துள்ளார்.

1977ஆம் ஆண்டுக்குப் பின்னர் வந்த ஐ.தே.க.வின் பொத்துவில் தொகுதி முதலாவது நாடாளுமன்ற உறுப்பினராகத் தெரிவு செய்யப்பட்ட மர்ஹும் டாக்டர் ஜலால்தீன், பாணமை, பொத்துவில், அக்கரைப்பற்று, பாலமுனை,  ஒலுவில், நிந்தவூர், மாளிகைக்காடு, அட்டாளைச்சேனை போன்ற கிராமங்களுக்கு பல அபிவிருத்திகளைச் செய்திருந்தார். இவர் அட்டாளைச்சேனைக்குச்செய்த அபிவிருத்திகளில், அட்டாளைச்சேனை - ஆலங்குளம் பாவங்காய் வீதி அமைப்பை அட்டாளைச்சேனை மக்கள் ஒருபோதும் மறந்துவிட முடியாது.

இவ்வீதி அமைப்பின் காரணமாகவே அட்டாளைச்சேனை மக்களின் பொருளாதாரம், விவசாயம், கல்வி போன்ற துறைகள் வளர்ச்சி அடைந்து காணப்படுகின்றன. இம்மகத்தான பணியைச் செய்த டாக்டர் ஜலால்தீனின்  ஞாபகார்த்தமாக அட்டாளைச்சேனை - ஆலங்குளம் பாவங்காய் வீதி என்ற பெயரை மாற்றி இவ்வீதிக்கு டாக்டர் ஜலால்தீன் பெருந்தெரு என பெயர் சூட்டுவது மிகப் பொருத்தமுடையதாகும் என அட்டாளைச்சேனை பிரதேச பொதுமக்களும் எதிர்பார்க்கின்றனர்.

எனவே, காலஞ்சென்ற டாக்டர்  ஜலால்தீனின் சேவையை நினைவு கூறும் முகமாக அவரின் பெயரை இவ்வீதிக்கு சூட்ட துரித நடவடிக்கைகளை எடுக்குமாறு இளைஞர் காங்கிரஸ் அமைப்பாளரும் அட்டாளைச்சேனை ஸ்ரீலங்கா முஸ்லிம் காங்கிரஸ் கட்சியின் மத்திய குழுவின் ஆலோசகர்களில் ஒருவருமான இக்பால் எம் யூசுப், குறிப்பிட்டவர்களிடம் வேண்டுகோளை விடுத்துள்ளார்.