அம்பாறையில் 1,103 குடும்பங்கள் மீள்குடியேற்றப்படவில்லை

-.எஸ்.கார்த்திகேசு

யுத்தம் முடிந்து ஆறு வருடங்களானபோதிலும், அம்பாறை மாவட்டதில் 1,103 குடும்பங்கள் தங்களது சொந்த இடங்களில் மீள்குடியேற்றப்படாது வாழ்ந்துவருவதாக கிழக்கு மாகாணசபைக்கான தமிழ்த் தேசியக் கூட்டமைப்பு  உறுப்பினர் ரி.கலையரசன் தெரிவித்தார்.

இது தொடர்பில் நேற்று  செவ்வாய்க்கிழமை (09) விடுத்துள்ள அறிக்கையில், 'திருக்கோவில் பிரதேச செயலகப்பிரிவுக்குட்பட்ட சாகாமத்தில் 126 குடும்பங்களும் காஞ்சிரங்;குடாவில் 68 குடும்பங்களும் கஞ்சிகுடியாற்றில் 244 குடும்பங்களும்  தங்கவேலாயுதபுரத்தில் 270 குடும்பங்களும் வன்னியிலிருந்து அம்பாறை மாவட்டத்துக்கு இடம்பெயர்ந்த 63 குடும்பங்களுமாக 771 குடும்பங்களும் மீள்குடியேற்றப்படாதுள்ளன' என்றார்.  

மேலும், ஆலையடிவேம்பு பிரதேச செயலகப் பிரிவுக்குட்பட்ட சாந்திபுரத்தில் 108 குடும்பங்களும் பொத்துவில் பிரதேச செயலகப்பிரிவுக்குட்பட்ட  கனகர் கிராமத்தில் 178 தமிழ், சிங்கள குடும்பங்களும் நாவிதன்வெளி பிரதேச செயலகப்பிரிவுக்குட்பட்ட சவளக்கடை, கம்பிக்காலையில் 46 குடும்பங்களும் மீள்குடியேற்றப்படாதுள்ளனர்' என அவர் கூறினார்.