கே.சி.சி.சி அணி மூன்று போட்டிகளில் வெற்றி

Super User / 2014 செப்டெம்பர் 15 , மு.ப. 06:37 - 0 - {{hitsCtrl.values.hits}}

- குணசேகரன் சுரேன்

கொக்குவில் மத்திய சனசமூக நிலையத்தின் ஏற்பாட்டில் வருடா வருடம் நடத்தப்படும் 30 பந்துபரிமாற்றங்கள் கொண்ட துடுப்பாட்ட சுற்றுப்போட்டியில் தொடர்ந்து மூன்று போட்டிகளில் கொக்குவில் மத்திய சனசமூக நிலைய அணி வெற்றிபெற்றது.

யாழ். மாவட்ட துடுப்பாட்ட கழகங்களின் அணிகளுக்கிடையில் நடைபெறும் இந்த சுற்றுப்போட்டியானது, கடந்த 7ஆம் திகதி முதல் கொக்குவில் இந்துக் கல்லூரி மைதானத்தில் நடைபெற்று வருகின்றது.

ஜெயரூபனின் சதத்தின் உதவியுடன் 10 இலக்குகளால் வெற்றி

கொக்குவில் மத்திய சனசமூக நிலைய அணி முதல் போட்டியில் நியுஸ்டார் விளையாட்டு கழக அணியுடன் மோதியது.

நாணய சுழற்சியில் வெற்றிபெற்று முதலில் துடுப்பெடுத்தாடுவதற்கு நியுஸ்டார் அணி களமிறங்கியது.
நிதானமாக துடுப்பெடுத்தாடிய நியுஸ்டார் அணி 30 பந்துபரிமாற்றங்களை முழுமையாக எதிர்கொண்டு 9 இலக்குகளை இழந்து 179 ஓட்டங்களை பெற்றுக்கொண்டது.

பதிலுக்கு துடுப்பெடுத்தாடிய கொக்குவில் மத்திய சனசமூக நிலைய அணி, 23.3 பந்துபரிமாற்றங்களில் இலக்குகள் இழப்பின்றி வெற்றியிலக்கை அடைந்தது. துடுப்பாட்டத்தில் ஏ.ஜெயரூபன் ஆட்டமிழக்காமல் 108 (12 ஆறு ஓட்டங்கள் அடங்கலாக) பெற்றுக்கொடுத்தார்.

4 இலக்குகளால் ஜொலிஸ்டார்ஸ் அணியை வீழ்த்தியது

இரண்டாவது போட்டியில் ஜொலிஸ்டார்ஸ் அணியுடன் சனிக்கிழமை (13) மோதியது.

முதலில் துடுப்பெடுத்தாடிய ஜொலிஸ்டார்ஸ் அணி 30 பந்துபரிமாற்றங்களில் 9 இலக்குகளை இழந்து 226 ஓட்டங்களை பெற்றது. துடுப்பாட்டத்தில் எம்.மதுஷன் 68 ஓட்டங்களை பெற்றுக்கொடுத்தார்.

பந்துவீச்சில் கொக்குவில் அணி சார்பாக ஆர்.பவிதரன் 4 இலக்குகளை வீழ்த்தினார்.

பதிலுக்கு துடுப்பெடுத்தாடிய கொக்குவில் அணி, 26 பந்துபரிமாற்றங்களில் 6 இலக்குகளை மாத்திரம் இழந்து வெற்றியிலக்கை அடைந்தது.

எஸ்.வல்லவக்குமரன் 68 ஓட்டங்களை பெற்றுக்கொடுத்தனர்.

ராகுலனின் துடுப்பாட்டத்தால் இலகு வெற்றி

மூன்றாவது போட்டியில் வட்டுக்கோட்டை ஓல்ட்கோல்ட் அணியுடன் கொக்குவில் அணி மோதியது.
முதலில் துடுப்பெடுத்தாடிய கொக்குவில் அணி 30 பந்துபரிமாற்றங்களில் 7 இலக்குகளை இழந்து 255 ஓட்டங்களை பெற்றுக்கொண்டது. ஆர்.இராகுலன் 93, என்.உமாநாத் 53 ஓட்டங்களையும் பெற்றுக்கொண்டனர்.

பதிலுக்கு துடுப்பெடுத்தாட களமிறங்கிய, ஓல்கோல்ட் அணி 30 பந்துபரிமாற்றங்களில் 9 இலக்குகளை இழந்து 139 ஓட்டங்களை மாத்திரம் பெற்றுக்கொண்டது. இதனால் கொக்குவில் மத்திய சனசமூக நிலைய அணி 116 ஓட்டங்களால் வெற்றிபெற்றது.

Comments - 0

அன்புள்ள வாசகர்களே,
நீங்கள் தெரிவிக்கும் கருத்துகளுக்கு நிர்வாகம் எவ்விதத்திலும் பொறுப்பாகாது. அவை உங்களின் தனிப்பட்ட கருத்துகளாகும். உங்களின் கருத்துகள் ஆசிரியரின் தகுந்த தணிக்கைக்குப் பிறகே பதிவேற்றம் செய்யப்படும் என்பதைக் கவனத்திற்கொள்க. உங்கள் யோசனைகளையும் எங்களுக்கு அனுப்புங்கள். .