விசாரணை நடத்தக் கோருகிறது மன்னிப்புச் சபை

இலங்கைப் பணிப்பெண்ணொருவரின் உடலில் சவூதி அரேபிய எஜமானரால் ஆணிகள் ஏற்றப்பட்டதாக கூறப்படுவது குறித்து வசிhரணை நடத்துமாறு சவூதி அரேபிய அதிகாரிகளை சர்வதேச மன்னிப்புச் சபை வலியுறுத்தியுள்ளது.

சவூதி அரேபியாவுக்குப் பணிப்பெண்ணாகச் சென்ற ஆரியவதி (49) அதிக வேலைப்பளு குறித்து முறையிட்டபோது அவரின் உடலில் 24 ஆணிகள் ஏற்றப்பட்டதாக செய்திகள் வெளியாகியுள்ளன. இலங்கையில் மேற்கொள்ளப்பட்ட சத்திரசிகிச்சையின் மூலம் அவரின் உடலிலிருந்து 18 ஆணிகள் அகற்றப்பட்டமை குறிப்பிடத்தக்கது.

இந்நிலையில் சவூதி அரேபிய நீதியமைச்சர் ஷேக் கலாநிதி மொஹமட் பின் அப்துல் அஸிஸ் அல் இஸாவுக்கு அனுப்பியுள்ள கடிதமொன்றில் இத் துஷ்பிரயோகத்திற்குப் பொறுப்பானவர்கள் நீதியின்முன் நிறுத்தப்பட்டு சர்வதேச நியமங்களுக்கு ஏற்பட விசாரணை நடத்தப்படுவதை உறுதிப்படுத்துமாறு சர்வதேச மன்னிப்புச் சபை கோரியுள்ளது.

அத்துடன் ஆரியவதி இலங்கைக்குத் திரும்புவதற்கு முன்னர் இக்குற்றச்சாட்டு குறித்து சவூதி அரேபிய பொலிஸார் அல்லது ஏனைய அதிகாரிகளுக்கு அறிவித்தாரா என்பது குறித்தும் விசாரணை நடத்தப்பட வேண்டும் எனவும் மன்னிப்புச் சபை கூறியுள்ளது.