துபாய் சொகுசு கார்கள் கென்யாவில் இறக்கம்

ஜப்பானிலிருந்து துபாய்க்கு கொண்டு செல்லப்பட்ட ஆயிரக்கணக்கான சொகுசு கார்கள், மத்திய கிழக்கில் நிலவும் போர் சூழல் காரணமாக கென்யாவின் லாமு (Lamu) தீவில் இறக்கப்பட்டுள்ளதாகத் துறைமுக அதிகாரிகள் தெரிவித்துள்ளனர். இந்த மோதலானது ஆப்பிரிக்க கப்பல் போக்குவரத்து மையங்களுக்கு ஒரு சாதகமான சூழலை ஏற்படுத்தியுள்ளது.

யுனெஸ்கோ (Unesco) உலக பாரம்பரிய தளமான லாமு தீவில் உள்ள களஞ்சியம் ஒன்றில், டஜன் கணக்கான போர்ஷே (Porsche) கார்கள் நிறுத்தி வைக்கப்பட்டுள்ளதை கென்ய ஊடகங்கள் காண்பித்தன. இந்தத் தீவை ஒரு முக்கிய போக்குவரத்து மையமாக மாற்றும் முயற்சியில் கென்ய அரசாங்கம் ஈடுபட்டுள்ளது.

இத்தாலியின் கிரிமால்டி குழுமத்திற்கு (Grimaldi Group) சொந்தமான இரண்டு கப்பல்களில் இருந்து கடந்த வாரத்தில் இருந்து இறக்கப்பட்ட 4,000க்கும் மேற்பட்ட வாகனங்களில் இந்த போர்ஷே கார்களும் அடங்கும்.

இந்தக் கப்பல்கள் கடந்த பெப்ரவரி 24 அன்று ஜப்பானின் யோகோஹாமாவிலிருந்து (Yokohama) புறப்பட்டன. அது புறப்பட்டு நான்கு நாட்களுக்குப் பிறகு, அமெரிக்கா மற்றும் இஸ்ரேல் ஈரானுக்கு எதிராகப் போரைத் தொடங்கியதால், ஹார்முஸ் ஜலசந்தி (Strait of Hormuz) வழியாகச் செல்லும் கப்பல் போக்குவரத்து முடக்கப்பட்டது.

இந்தக் கார்கள் சென்றடைய வேண்டிய துபாயின் ஜபெல் அலி (Jebel Ali) துறைமுகம், மார்ச் 1ஆம் திகதி ஈரானிய வான்வழித் தாக்குதலுக்கு உள்ளானது.

அடுத்த வாரம் மேலும் 5,000 வாகனங்களுடன் மற்றொரு கொள்கலன் கப்பல் லாமு துறைமுகத்திற்கு வரும் என்று எதிர்பார்க்கப்படுவதாக உள்ளூர் அதிகாரிகள் தெரிவித்துள்ளனர்.

"வளைகுடா நாடுகளுக்குச் செல்ல வேண்டிய சரக்குகளுடன் இன்னும் பல கப்பல்கள் கடலில் உள்ளன. ஆனால் அங்கு நிலைமை மோசமடைந்துள்ளதால், அந்தக் கப்பல்கள் கடலில் அலைந்து திரிகின்றன அல்லது மிதந்துகொண்டிருக்கின்றன" என்று லாமு துறைமுக மேலாளர் அப்துல்அஜிஸ் மசீ (Abdulaziz Mzee) புதன்கிழமை ஊடகங்களிடம் தெரிவித்தார்.

"அங்குள்ள மக்கள் துன்பங்களையும் சவால்களையும் எதிர்கொள்வதால் இது கொண்டாடப்பட வேண்டிய ஒன்றல்ல. ஆனால் அதே நேரத்தில் இது ஒரு வணிக ரீதியான ஆசீர்வாதமாகும்," என்றும் அவர் மேலும் குறிப்பிட்டார்.

மத்திய கிழக்கில் நிலைமை சீராகும் வரை இந்தக் கார்கள் லாமு துறைமுகத்திலேயே இருக்கும் என்று மசீ கூறினார்.

போர் காரணமாக கப்பல் போக்குவரத்து அதிகரிப்பதற்கு லாமு துறைமுகம் "தயார் நிலையில் உள்ளது" என்று கென்ய துறைமுகங்கள் ஆணையம் (X தளத்தில்) தெரிவித்துள்ளது.

தெற்கு சூடான் மற்றும் எத்தியோப்பியாவை கென்ய கடற்கரையுடன் இணைக்கும் 23 பில்லியன் டாலர் மதிப்பிலான பிராந்திய போக்குவரத்து வழித்தடத்தின் ஒரு பகுதியாக, 2012 இல் லாமு துறைமுகம் அறிவிக்கப்பட்டு 2021 இல் தனது செயல்பாட்டைத் தொடங்கியது.

இது ஆப்பிரிக்காவின் முன்னணி ஆழ்கடல் கப்பல் போக்குவரத்து மையமாக (Deep-water transhipment hub) மாறும் என கென்ய துறைமுக அதிகாரிகள் தெரிவிக்கின்றனர்.