‘நிறைவேற்று அதிகாரமுடைய ஜனாதிபதி முறை நீக்கப்படக் கூடாது’

நிறைவேற்று அதிகாரமுடைய ஜனாதிபதி முறையை நீக்கக் கூடாதென நாடாளுமன்ற உறுப்பினர் உதய கம்மன்பில இன்று நாடாளுமன்றில் தெரிவித்தார்.

உலகில் மிகவும் பிரபலமான அதிகார முறையே இந்த நிறைவேற்று அதிகாரமுடைய ஜனாதிபதி முறை என்றும் அவர்  தெரிவித்தார்.

இன்று நாடாளுமன்றத்தில் மக்கள் விடுதலை முன்னணி முன்வைத்த நிறைவேற்று அதிகாரமுடைய ஜனாதிபதி முறையை ஒழிப்பது தொடர்பான பிரேரணை மீதான விவாதத்தில் உரையாற்றும் போதே உதய கம்மன்பில இவ்வாறு தெரிவித்தார்.

உலகிலுள்ள பெரும்பாலான நாடுகளில் இந்த ஜனாதிபதி முறையே காணப்படும் நிலையில், இலங்கையில் மாத்திரம் ஏன் இந்த முறைக்கு எதிர்ப்பு என்றும் அவர் கேள்வி எழுப்பினார்.

இலங்கையிலுள்ள நிறைவேற்று அதிகாரமுடைய ஜனாதிபதி முறையில் தவறில்லை. அதனை நடைமுறைப்படுத்துவதில் தான் தவறு உள்ளது. எனவே எமது அபிப்ராயத்தின் படி இந்த முறை நீக்கப்படக் கூடாது என்றார்.