பொத்தல -பாலசூரியவின் பதிவுகள் குறித்து அறிக்கை சமர்ப்பிக்க உத்தரவு

இலங்கையின் மூத்த ஊடகவியலாளர்கள் பொத்தல ஜெயந்த மற்றும் சனத் பாலசூரிய ஆகியோரின் முகநூல் பதிவுகள் குறித்து அறிக்கை சமர்ப்பிக்குமாறு கொழும்பு மேல் நீதிமன்றம் உத்தரவு பிறப்பித்துள்ளது.

நீதிமன்றப் பதிவாளர் எழுத்துப்பூர்வமாக இது குறித்து தெரிவித்ததை அடுத்து, கொழும்பு மேல் நீதிமன்ற நீதிபதி மஞ்சுள திலகரத்ன இந்த உத்தரவைப் பிறப்பித்தார். 

சர்ச்சைக்குரிய கிரிஷ் டவர் திட்டம் தொடர்பாக ஸ்ரீலங்கா பொதுஜன பெரமுனவின் பாராளுமன்ற உறுப்பினர் நாமல் ராஜபக்ஷ மீது சுமத்தப்பட்ட குற்றப்பத்திரிகைகள் தொடர்பாக கொழும்பு மேல் நீதிமன்ற நீதிபதி மஞ்சுளா திலகரத்ன பற்றி மூத்த ஊடகவியலாளர்கள் பேஸ்புக் பதிவிட்டுள்ளதாக கூறப்படுகிறது.

நீதிமன்றப் பதிவாளர், அந்த அறிக்கைகள் நீதிமன்ற அவமதிப்பாகக் கருதப்படுவதாகவும், இந்த விஷயத்தில் பொருத்தமான உத்தரவைப் பிறப்பிக்குமாறும் நீதிபதியிடம் கோரியிருந்தார்.

இந்தக் கோரிக்கைக்குப் பதிலளித்த கொழும்பு மேல் நீதிமன்ற நீதிபதி, மேற்படி பேஸ்புக் அறிக்கைகளுடன் ஒரு அறிக்கையைச் சமர்ப்பிக்க உத்தரவிட்டார், அதன் பிறகு அவர் பொருத்தமான உத்தரவைப் பிறப்பிப்பார். 

மஹிந்த ராஜபக்ஷ ஜனாதிபதியாக இருந்தபோது கடத்தப்பட்டு தாக்கப்பட்ட பின்னர், இலங்கையின் மூத்த ஊடகவியலாளர்கள் போத்தல ஜெயந்த மற்றும் சனத் பாலசூரிய ஆகியோர் தற்போது வெளிநாட்டில் வசிக்கின்றனர்.