பொலிஸாரை ஏழு நாள்கள் தனிமைப்படுத்த நடவடிக்கை

பல நிபந்தனைகளின் கீழ், ஒருநாள் விடுமுறையில் சென்று மீண்டும் கடமைகளுக்குச் செல்லும் பொலிஸாரை, ஏழு நாள்கள் வரை கடமையில் ஈடுபடுத்த வேண்டாமென, பதில் பொலிஸ்மா அதிபர் சி.டி விக்ரமரத்ன, பொலிஸ் அதிகாரிகளுக்கு உத்தரவிட்டுள்ளார்.

கொரோனா தொற்று காரணமாக, பொலிஸ் அதிகாரிகளின் விடுமுறைகளை இரத்துச்செய்வதற்கு  நடவடிக்கை எடுக்கப்பட்டிருந்தது. எனினும் பல நிபந்தனைகளின் கீழ், பொலிஸ் அதிகாரிகளுக்கு ஒருநாள் விடுமுறை வழங்குவதற்கு தீர்மானிக்கப்பட்டது.

அவ்வாறு விடுமுறையில் சென்று, மீண்டும் கடமைகளுக்குத் திரும்பும் அதிகாரிகளை,  இரண்டு நாள்கள் தனியாக தங்க வைக்குமாறு ஆரம்பத்தில் ஆலோசனைகள் வழங்கப்பட்டிருந்த போதும், சுகாதார அதிகாரிகளின் ஆலோசனைகளுக்கமைய பொலிஸாரை ஏழு நாள்கள் கடமையில் ஈடுபடுத்தாமல் இருக்கமாறு, பதில் பொலிஸ்மா அதிபர் அறிவித்துள்ளார்.