யானை மோதலில் இளம் தாய் பலி (வீடியோ)

கர்நாடக மாநிலம் குடகில் உள்ள புகழ்பெற்ற சுற்றுலாத் தலமான துபாரே யானைகள் முகாமில் (Dubare Elephant Camp), இரண்டு யானைகள் திடீரென சண்டையிட்டுக் கொண்டதில், சுற்றுலா சென்ற சென்னையைச் சேர்ந்த இளம் பெண் ஒருவர் உடல் நசுங்கி பரிதாபமாக உயிரிழந்தார்.

சென்னையைச் சேர்ந்த ஜினு (33) என்ற பெண், தனது கணவர் மற்றும் குழந்தையுடன் கர்நாடகாவிற்குச் சுற்றுலா சென்றுள்ளார். சம்பவத்தன்று, துபாரே முகாமில் உள்ள காவிரியாற்றில் யானைகள் குளிப்பதை அவர்கள் வேடிக்கை பார்த்துக் கொண்டிருந்தனர்.

அப்போது, ஆற்றில் குளித்துக் கொண்டிருந்த இரண்டு பிரம்மாண்ட யானைகளுக்கு இடையே திடீரென கடுமையான சண்டை மூண்டது. கோபத்தில் இரு யானைகளும் ஒன்றையொன்று மிரட்டலாகத் தாக்கி மோதிக்கொண்டன.

யானைகள் சண்டையிடுவதைக் கண்டு அதிர்ச்சியடைந்த சுற்றுலாப் பயணிகள் அனைவரும் அலறியடித்துக் கொண்டு நாலாபுறமும் சிதறி ஓடினர். ஆனால், துரதிர்ஷ்டவசமாக ஜினுவால் அங்கிருந்து உடனடியாகத் தப்பிக்க முடியவில்லை.

சண்டையின் உச்சக்கட்டத்தில், கட்டுப்பாட்டை இழந்த ஒரு யானை கரையை நோக்கி ஓடிவந்து, அங்கிருந்த ஜினுவின் மீது திடீரெனச் சரிந்து விழுந்தது. யானையின் அசுர எடையில் சிக்கிய ஜினு, உடல் நசுங்கி மரணப் போராட்டம் நடத்தினார்.

கையில் குழந்தையை வைத்திருந்த அவரது கணவரும், அங்கிருந்த ஊழியர்களும் ஓடிவந்து ஜினுவை மீட்கப் போராடினர். எனினும், பலத்த காயமடைந்த அந்த இளம் தாய், தனது கணவனின் கண் முன்னாலேயே சம்பவ இடத்திலேயே துடிதுடித்து உயிரிழந்தார்.

மகிழ்ச்சியாகத் தொடங்கிய சுற்றுலா, சில நிமிடங்களில் மரண ஓலமாக மாறிய இந்தச் சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியுள்ளது. வனவிலங்குகள் நடமாடும் மற்றும் பராமரிக்கப்படும் இடங்களுக்குச் செல்லும்போது, சுற்றுலாப் பயணிகள் எவ்வளவு எச்சரிக்கையாக இருக்க வேண்டும் என்பதற்கு இந்தச் சம்பவம் ஒரு கோரமான பாடமாக அமைந்துள்ளது.