கடுவெல- கடவத்தை புறநகர் நெடுஞ்சாலை திறப்பு பிற்போடப்பட்டுள்ளது

தெற்கு அதிவேக நெடுஞ்சாலையின் கடுவெலயையும் கடவத்தையையும் இணைக்கும் கொழும்பு புறநகர் அதிவேக நெடுஞ்சாலையின் இரண்டாவது கட்ட திறப்பு விழா பிற்போடப்பட்டுள்ளதாக திட்ட பணிப்பாளர் திருமதி ரீ.எஸ். எச். அபேவிக்ரம, நேற்று வெள்ளிக்கிழமை தெரிவித்தார்.

கொழும்பின் புறநகர் அதிவேக நெடுஞ்சாலையை தெற்கு அதிவேக நெடுஞ்சாலையுடன் இணைக்கும் கட்டங்களில், கொட்டாவையிலிருந்து கடுவெல வரையான முதற்கட்டம் முன்னைய அரசாங்கத்தால் திறந்து வைக்கப்பட்டிருந்தது.

இரண்டாவது கட்டம் கடுவெலயிலிருந்து கடவத்தை வரையானதாகும். மூன்றாவது கட்டம் கடவத்தையிலிருந்து கெரவலபிட்டிய வரையானதாகும்.

புறநகர் அதிவேக நெடுஞ்சாலையின் இரண்டாம் கட்டமான கடுவெல- கடவத்தை அதிவேக நெடுஞ்சாலை நேற்று திறந்து வைக்கப்படவிருந்ததாகவும் அது ஜூலை மாத நடுப்பகுதிக்கு பிற்போடப்பட்டுள்ளதாகவும் திட்டப் பணிப்பாளர் தெரிவித்தார்.