கந்தளாயில் 22,000 ஏக்கரில் மாத்திரம் நெற் செய்கைக்கு அனுமதி

(எப்.முபாரக்)
இவ்வாண்டு கந்தளாய் பிரதேசத்தில் 22 ஆயிரம் ஏக்கர் காணியில் மாத்திரமே சிறுபோக நெற்செய்கையை மேற்கொள்வதற்கு அனுமதி வழங்கப்பட்டுள்ளது.
 
நேற்று கந்தளாய் அக்கிரபோதி தேசிய பாடசாலையில் திருகோணமலை மாவட்ட அரசாங்க அதிபர் தலைமையில் நடைபபெற்ற விவசாய சம்மேளனங்களின் கூட்டத்திலே இத்தீர்மானம் மேற்கொள்ளப்பட்டது.
 
கந்தளாய் குளத்தில் 114,583 ஏக்கர் அடி நீரும், வெண்டரசபுர குளத்தில் 17,810 அடி ஏக்கர் நீரும், வான்எல குளத்தில் 2,180 அடி ஏக்கர் நீரும் இருப்பதாக இக் கூட்டத்தில்  தெரிவிக்கப்பட்டது.

இந் நீரின் அளவினை வைத்தே மேற்படி சிறுபோகத்திற்கான நெற் செய்கைக்கான காணி வரையரை செய்யப்பட்டுள்ளது.
 
3 தொடக்கம் 3 1/2 மாதங்களில் அறுவடை செய்யக்கூடிய நெல்லினங்களையே செய்கை பண்ண வேண்டும் எனவும் எதிர்வரும் செப்டெம்பர் மாதம் 26 ஆம் திகதிக்கு முன்னர் விதைப்பு நடவடிக்கை அனைத்தும் பூர்த்தி அடைய வேண்டும் எனவும் இந்தக் கூட்டத்தில் மேலும் தீர்மானிக்கப்பட்டது.