பேரணி, நடைபவனி...

மு.இராமச்சந்திரன், எஸ்.கணேசன், எஸ்.சுஜிதா

மூன்றம்ச கோரிக்கைகளை முன்வைத்து இருவேறு அமைப்புகள், மலையகத்தின் பல்வேறு பகுதிகளிலும், ஞாயிற்றுக்கிழமை கவனயீர்ப்பு பேரணிகளை நடத்தின.

பெருந்தோட்ட தொழிலாளர்களுக்கான நாட் சம்பளத்தை ஆயிரம் ரூபாவாக உயர்த்துதல், நிரந்தர மாதச் சம்பளம், சொந்தக்காணி மற்றும் வீட்டுரிமை ஆகிய மூன்றம்ச கோரிக்கைகளை முன்வைத்து, தலவாக்கலையில் ஆரம்பமான கவனயீர்ப்பு வாகன பேரணி, கொட்டகலை, ஹட்டன், பொகவந்தலாவை, மஸ்கெலியா நகரம் வரைச் சென்றது.

தொழிலாளர் போராட்ட மத்திய நிலையத்தின் செயலாளர் துமிந்த நாகமுவ. கிறிஸ்தவ தொழிலாளர் சகோதரத்துவ தோழர் மோகன் சுப்பரமணியம் ஆகியோரின் தலைமையில் நடைபெற்ற கவனயீர்ப்பு  பேரணியில், 11  தொழிற்சங்கங்கள் மற்றும் சிவில் அமைப்புக்கள்  இணைந்துக்கொண்டன.

இதேவேளை, மேற்படி கோரிக்கைகளை முன்வைத்து, செட்டெக் நிறுவனம் ஏற்பாடு செய்திருந்த விழிப்புணர்வு நடைபவனி மற்றும் கையெழுத்து வேட்டை என்பன ஹட்டன் நகரில் நடைபெற்றன. இப்போராட்டத்தில் நூற்றுக்கும் மேற்பட்டவர்கள் கலந்துகொண்டனர்.