இந்தியாவுக்கு வெற்றியிலக்கு 549 ஓட்டங்கள்

தென்னாபிரிக்காவுக்கெதிரான இரண்டாவது டெஸ்ட் போட்டியில் 549 ஓட்டங்கள் என்ற வெற்றியிலக்கு இந்தியாவுக்கு நிர்ணயிக்கப்பட்டுள்ளது.

இரண்டு போட்டிகள் கொண்ட இத்தொடரின் முதலாவது போட்டியில் தென்னாபிரிக்கா வென்ற நிலையில், குவஹாத்தியில் சனிக்கிழமை (22) ஆரம்பித்த இப்போட்டியில் முதலில் துடுப்பெடுத்தாடிய தென்னாபிரிக்கா தமது முதலாவது இனிங்ஸில் சகல விக்கெட்டுகளையும் இழந்து 489 ஓட்டங்களைப் பெற்றது. செனுரன் முத்துசாமி 109, மார்கோ ஜன்சன் 93, ட்ரிஸ்டன் ஸ்டப்ஸ் 49, அணித்தலைவர் தெம்பா பவுமா 41, கைல் வெரைன் 45, ஏய்டன் மார்க்ரம் 38, றயான் றிக்கெல்டன் 35, டொனி டி ஸொர்ஸி 28 ஓட்டங்களைப் பெற்றனர். பந்துவீச்சில், குல்தீப் யாதவ் 4, ஜஸ்பிரிட் பும்ரா, இரவீந்திர ஜடேஜா, மொஹமட் சிராஜ் ஆகியோர் தலா 2 விக்கெட்டுகளைக் கைப்பற்றினர்.

பதிலுக்கு தமது முதலாவது இனிங்ஸில் துடுப்பெடுத்தாடிய இந்தியா, கேஷவ் மஹராஜ், சைமன் ஹாமர் (3), ஜன்சனிடம் (6) விக்கெட்டுகளைப் பறிகொடுத்து சகல விக்கெட்டுகளையும் இழந்து 201 ஓட்டங்களையே பெற்றது. யஷஸ்வி ஜைஸ்வால் 58, வொஷிங்டன் சுந்தர் 48 ஓட்டங்களைப் பெற்றார்.

இந்நிலையில் தமது இரண்டாவது இனிங்ஸில் துடுப்பெடுத்தாடிய தென்னாபிரிக்கா 5 விக்கெட்டுகளை இழந்து 260 ஓட்டங்களைப் பெற்ற நிலையில் தமது இனிங்ஸை இடைநிறுத்தியது. ஸ்டப்ஸ் 94, டி ஸொர்ஸி 49, றிக்கெல்டன் 35, வியான் முல்டர் ஆட்டமிழக்காமல் 35, மார்க்ரம் 29 ஓட்டங்களைப் பெற்றனர். பந்துவீச்சில் ஜடேஜா 4, சுந்தர் ஒரு விக்கெட்டைக் கைப்பற்றினர்.