இரண்டாமிடத்துக்கு முன்னேறிய அப்ரார் அஹ்மட்

சர்வதேச கிரிக்கெட் சபையின் இருபதுக்கு – 20 சர்வதேசப் போட்டிகளுக்கான பந்துவீச்சளர்களின் தரவரிசையில் இரண்டாமிடத்துக்கு பாகிஸ்தானின் அப்ரார் அஹ்மட் முன்னேறியுள்ளார்.

அவுஸ்திரேலியாவுக்கெதிரான 3 போட்டிகளில் ஆறு விக்கெட்டுகளைக் கைப்பற்றியமையைத் தொடர்ந்தே நான்காமிடத்திலிருந்து இரண்டு இடங்கள் முன்னேறி இரண்டாமிடத்தையடைந்துள்ளார்.

இதேவேளை இலங்கைக்கெதிரான 3 போட்டிகளில் ஐந்து விக்கெட்டுகளைக் கைப்பற்றிய இங்கிலாந்தின் அடில் ரஷீட், ஆறாமிடத்திலிருந்து இரண்டு இடங்கள் முன்னேறி நான்காமிடத்தையடைந்துள்ளார்.

இந்நிலையில் அவுஸ்திரேலியாவுக்கெதிரான 3 போட்டிகளிலும் ஏழு விக்கெட்டுகளைக் கைப்பற்றிய பாகிஸ்தானின் மொஹமட் நவாஸ், 15ஆம் இடத்திலிருந்து எட்டு இடங்கள் முன்னேறி ஏழாமிடத்தையடைந்துள்ளார்.

இதுதவிர பாகிஸ்தானுக்கெதிரான முதலிரண்டு போட்டிகளிலும் ஐந்து விக்கெட்டுகளைக் கைப்பற்றிய அவுஸ்திரேலியாவின் அடம் ஸாம்பா, 10ஆம் இடத்திலிருந்து ஓரிடம் முன்னேறி ஒன்பதாமிடத்தையடைந்துள்ளார்.

முதல் 10 பந்துவீச்சாளர்களின் தரவரிசை பின்வருமாறு,

1. வருண் சக்கரவர்த்தி, 2. அப்ரார் அஹ்மட், 3. ரஷீட் கான், 4. அடில் ரஷீட், 5. ஜேக்கப் டஃபி, 6. வனிது ஹசரங்க, 7. மொஹமட் நவாஸ், 8. முஸ்தபிசூர் ரஹ்மான், 9. அடம் ஸாம்பா, 10. முஜீப் உர் ரஹ்மான்.

இதேவேளை அவுஸ்திரேலியாவுக்கெதிரான மூன்று போட்டிகளில் 119 ஓட்டங்களைப் பெற்றதோடு, 3 விக்கெட்டுகளைக் கைப்பற்றிய பாகிஸ்தானின் சைம் அயூப், சகலதுறைவீரர்களுக்கான தரவரிசையில் இரண்டாமிடத்திலிருந்து ஓரிடம் முன்னேறி முதலாமிடத்தையடைந்துள்ளார்.

இந்நிலையில் பாகிஸ்தானின் மொஹமட் நவாஸ், ஐந்தாமிடத்திலிருந்து ஓரிடம் முன்னேறி நான்காமிடத்தையடைந்துள்ளார்.

முதல் ஐந்து சகலதுறைவீரர்களின் தரவரிசை பின்வருமாறு,

1. சைம் அயூப், 2. சிகண்டர் ராசா, 3. ஹர்திக் பாண்டியா, 4. மொஹமட் நவாஸ், 5. றொஸ்டன் சேஸ்.

இதேவேளை இலங்கைக்கெதிரான 3 போட்டிகளில் 81 ஓட்டங்களைப் பெற்ற இங்கிலாந்தின் ஜொஸ் பட்லர், துடுப்பாட்டவீரர்களுக்கான தரவரிசையில் நான்காமிடத்திலிருந்து ஓரிடம் முன்னேறி மூன்றாமிடத்தையடைந்துள்ளார்.

இந்நிலையில் இங்கிலாந்துக்கெதிரான மூன்று போட்டிகளில் 80 ஓட்டங்களைப் பெற்ற இலங்கையின் பதும் நிஸங்க, ஆறாமிடத்திலிருந்து ஓரிடம் முன்னேறி ஐந்தாமிடத்தையடைந்துள்ளார்.

இதுதவிர நியூசிலாந்துக்கெதிரான ஐந்தாவது போட்டியில் 63 ஓட்டங்களைப் பெற்ற இந்தியாவின் சூரியகுமார் யாதவ், ஏழாமிடத்திலிருந்து ஓரிடம் முன்னேறி ஆறாமிடத்தையடைந்துள்ளார்.

இதேவேளை இந்தியாவுக்கெதிரான நான்காவது போட்டியில் 62 ஓட்டங்களைப் பெற்ற நியூசிலாந்தின் டிம் செய்ஃபேர்ட், 10ஆம் இடத்திலிருந்து ஓரிடம் முன்னேறி ஒன்பதாமிடத்தையடைந்துள்ளார்.

முதல் 10 துடுப்பாட்டவீரர்களின் தரவரிசை பின்வருமாறு,

1. அபிஷேக் ஷர்மா, 2. பில் ஸோல்ட், 3. ஜொஸ் பட்லர், 4. திலக் வர்மா, 5. பதும் நிஸங்க, 6. சூரியகுமார் யாதவ், 7. சஹிப்ஸடா பர்ஹான், 8. ட்ரெவிஸ் ஹெட், 9. டிம் செய்ஃபேர்ட், 10. மிற்செல் மாஷ்