உலகக் கிண்ணத்திலிருந்து வெளியேற்றப்பட்ட மெஸ்ஸியின் மியாமி

சர்வதேச கால்பந்தாட்ட சம்மேளனத்தின் கழக உலகக் கிண்ணத் தொடரிலிருந்து லியனல் மெஸ்ஸியின் இன்டர் மியாமி வெளியேற்றப்பட்டுள்ளது.

ஐக்கிய அமெரிக்காவின் அத்லாண்டாவில் ஞாயிற்றுக்கிழமை (29) நடைபெற்ற பிரெஞ்சு லீக் 1 கழகமான பரிஸ் ஸா ஜெர்மைனுடனான இறுதி 16 அணிகளுக்கான சுற்றுப் போட்டியில் 0-4 என்ற கோல் கணக்கில் தோற்றே தொடரிலிருந்து ஐக்கிய அமெரிக்க கழகமான மியாமி வெளியேறியது.

பரிஸ் ஸா ஜெர்மைன் சார்பாக ஜோவா நேவிஸ் இரண்டு கோல்களையும், அஷ்ரஃப் ஹக்கிமி ஒரு கோலையும் பெற்றதோடு மற்றைய கோல் ஓவ்ண் கோல் முறையில் பெறப்பட்டிருந்தது.

இதேவேளை புளோரிடாவில் திங்கட்கிழமை (30) நடைபெற்ற பிரேஸிலியக் கழகமான பிளமெங்கோவுடனான போட்டியில் 4-2 என்ற கோல் கணக்கில் வென்று காலிறுதிப் போட்டிக்கு ஜேர்மனிய புண்டெலிஸ்கா கழகமான பயெர்ண் மியூனிச் தகுதி பெற்றது.

மியூனிச் சார்பாக ஹரி கேன் இரண்டு கோல்களையும், லியோன் கொரெட்ஸ்கா ஒரு கோலையும் பெற்றதோடு மற்றைய கோல் ஓவ்ண் கோல் முறையில் பெறப்பட்டிருந்தது. பிளமெங்கோ சார்பாக ஜெர்சன், ஜோர்ஜினியோ ஆகியோர் தலா ஒவ்வொரு கோலைப் பெற்றனர்.