மேற்கிந்தியத் தீவுகளைத் தோற்கடித்த அவுஸ்திரேலியா

மேற்கிந்தியத் தீவுகளுக்கெதிரான இரண்டாவது இருபதுக்கு – 20 சர்வதேசப் போட்டியிலும் அவுஸ்திரேலியா வென்றது.

ஐந்து போட்டிகள் கொண்ட இத்தொடரின் முதலாவது போட்டியில் ஏற்கெனவே வென்ற அவுஸ்திரேலியா, ஜமைக்காவில் புதன்கிழமை (23) நடைபெற்ற இப்போட்டியின் நாணயச் சுழற்சியில் வென்று முதலில் களத்தடுப்பிலீடுபடத் தீர்மானித்தது. அவுஸ்திரேலியா சார்பாக மத்தியூ குனுமென் இருபதுக்கு – 20 சர்வதேசப் போட்டிகளில் அறிமுகத்தை மேற்கொண்டார்.

முதலில் துடுப்பெடுத்தாடிய மேற்கிந்தியத் தீவுகள், பிரெண்டன் கிங்கின் 51 (36), அன்ட்ரே ரஸலின் 36 (15) ஓட்டங்களோடு 20 ஓவர்களில் 8 விக்கெட்டுகளை இழந்து 172 ஓட்டங்களைப் பெற்றது. பந்துவீச்சில், அடம் ஸாம்பா 4-0-29-3, கிளென் மக்ஸ்வெல் 2-0-15-2, நாதன் எலிஸ் 4-0-34-2, பென் டுவார்ஷுஸ் 4-0-37-1, மத்தியூ குனுமென் 4-0-33-0 என்ற பெறுதிகளைக் கொண்டிருந்தனர்.

பதிலுக்கு 173 ஓட்டங்களை வெற்றியிலக்காகக் கொண்டு துடுப்பெடுத்தாடிய அவுஸ்திரேலியா, ஜொஷ் இங்லிஸின் ஆட்டமிழக்காத 78 (33), கமரன் கிறீனின் ஆட்டமிழக்காத 56 (32) ஓட்டங்களோடு 15.2 ஓவர்களில் 2 விக்கெட்டுகளை இழந்த நிலையில் வெற்றியிலக்கையடைந்தது. பந்துவீச்சுல் அகீல் ஹொஸைன் 4-0-31-0 என்ற பெறுதிகளைக் கொண்டிருந்தார்.

இப்போட்டியின் நாயகனாக இங்லிஸ் தெரிவானார்.