ராவுலின் சாதனையை ரொனால்டோ முறியடித்தார்

லெவண்டி அணிக்கெதிரான போட்டியில் ரியல் மட்ரிட் கால்பந்தாட்டக் கழகம் 3-0 என்ற கோல் கணக்கில் வெற்றி பெற்ற போட்டியில், அவ்வணியின் நட்சத்திர வீரரான கிறிஸ்ட்டியானோ ரொனால்டோ, ராவுலின் ரியல் மட்ரிட் அணிக்காக அதிக கோல்கள் பெற்றவர் என்ற சாதனையை முறியடித்தார்.

16 வருடங்களாக 741 போட்டிகளில் விளையாடி ராவுல் பெற்ற 323 என்ற கோல்கள் என்ற சாதனையை 30 வயதான ரொனால்டோ, வெறும் ஏழு பருவங்களில் 310 போட்டிகளில் மட்டும் விளையாடி அவரின் சாதனையைத் தகர்த்தார்.

இந்தபோட்டியின் 27வது நிமிடத்தில் மார்செலோவின் கோலுக்கு உதவி புரிந்த ரொனால்டோ, 30வது நிமிடத்தில் தனது சாதனை 324 வது கோலைப் பெற்றிருந்தார். பின்னர் 81வது நிமிடத்தில் மாற்றுவீரர் ஜெசே ரொட்ரிகாஸ் ஒரு கோலைப் பெற ரியல் மட்ரிட் அணி போட்டியில் 3-0 என்ற கோல் கணக்கில் வெற்றி பெற்றது.