ஏறாவூரில் அதி அழுத்த மின்; இலத்திரனியல் சாதனங்கள் செயலிழப்பு

-ஏ.எச்.ஏ.ஹுஸைன்

மட்டக்களப்பு, ஏறாவூர் மின் பொறியியலாளர் பிரிவின் கீழ் மின் விநியோகிக்கப்படும் பல கிராமங்களில் இன்று செவ்வாய்க்கிழமை பிற்பகல் மின்விநியோகம்  தடைப்பட்டு, திடீரென்று அதி அழுத்த மின் விநியோகம் மின்சுற்றில் பாய்ச்சப்பட்டதால், மின்னியல் சாதனங்கள் செயலிழந்துள்ளதாக மின் பாவனையாளர்கள் தெரிவித்தனர்.

இதுவரையில் நூற்றுக்கும் மேற்பட்ட இலத்திரனியல்; சாதனங்கள் செயலிழந்துள்ளன.

செங்கலடி, எல்லை நகர், கணபதி நகர், விடுதி உள்ளிட்ட இடங்களில் இச்சம்பவம் இடம்பெற்றதாகவும் மின் பாவனையாளர்கள் கூறினர்.

இதனால் வீடுகள் மற்றும் அலுவலகங்களில் பயன்படுத்தப்பட்டுவந்த இலத்திரனியல் சாதனங்களான கணினிகள், வழிபதனப்படுத்திகள் (ஏசி), படப்பிரதி இயந்திரங்கள், பக்ஸ் இயந்திரங்கள், குளிர்சாதனப் பெட்டிகள், சலவை இயந்திரங்கள், தொலைக்காட்சிப் பெட்டிகள் உள்ளிட்ட இலத்திரனியல் சாதனங்கள் செயலிழந்துள்ளன.

இது தொடர்பில் இலங்கை மின்சார சபையின் பிராந்திய காரியாலயத்துக்கு அறிவிக்கப்பட்டுள்ளதாக மின் பாவனையாளர்கள் தெரிவித்தனர்.